قصة " القطة البيضاء "

الجــــزء الاول : انا  محمد من ورزازات
القصة اللي غانعاود ليكوم وقعات ليا وربي عالم.
ف 2010 كنت خدام فواحد الفران هنا فورزازات وراكوم عارفين الفران كاتبدا فيه الخدمة بالليل
بقيت خدام فداك الفران تقريبا 3 اشهر أنا اللي كانشعل ليه حيث كانخدمو بالعود ماشي بالغاز ولا الضو
كانجي مع 1 ديال الليل كانشعل للفران وكانجلس فيه بوحدي حتى 2 ونص ماللي كايجيو اللي كايعجنو ويطيبو، واحد النهار جيت ليه كيف العادة مع الوحدة ديال الليل باش نشعل الفران ولكن هاد المرة جيت سكران الله يسمح ليا المهم دخلت شعلت الضو وهي تبان ليا واحد القطة بيضة حدا الباب ، ما ديتهاش فيها فالاول وما تسوقتش ليها، وبقيت خدام كاندير العود وباغش نشعل ليه، شوية كانشوف ديك القطة كاتجي حتى لحدايا وتعاود ترجع حدا الباب وكادير واحد الصوت غريب، ما تسوقتش ليها قلت غير شي قطة جيعانة، شعلت الفران وبقيت مريح  ناشط مع راسي وديك القطة كل ساعة كاتجي حدايا وتمشي بواحد الطريقة خلاتني نتعصب، ومع بنادم كان سكران الله يسمح لينا هزيتها ورميتها فالفران لداخل بلا ما نحس ورجعت ريحت بلاصتي فرحان، شوية وانا نسحى الخوت سحيت والله العظيم الى سحيت بحال الى ما كنت سكران اصلا، شوية كانحس بشي حاجة كاتنزل ليا من عيني كاندير يدي نشوف كانلقا الدم نازل منها وما بقيتش كانشوف بالعين اليسرية، بديت نغوت ونضرب حتا نزل مول الفران والجيران ولقاوني فديك الحالة داوني لسبيطار، مللي فقت فالصباح لقيت الفاصما على عيني عرفت بللي دااكشي صحيح حيت كان يسحاب ليا غير كانحلم، تفكرت ديك القطة مسكينة وبديت نبكي وعرفت باللي بسبابها وقع ليا هادشي اللي انا فيه دابا، بقيت فالسبيطار يومين وخرجت رجعت لدار لقيت الواالدة مسكينة كاتبكي وكاتقول ليا اش درتي المسخوط اش درتي المسخوط، كانقول ليها والو وكاتقول ليا علاش جاو يسولو فيك علااش، الصراحة ما عرفت علاش كاتهضر وتخلعت ولكن ما بغيتش نبين ليها،,,,,,,, يتبـــــــــــع

الجــــــــــــزء التانــــــــــــــي اخوتي : مشيت ننعس شوية وما بغاش نعاس يديني بديت نسمع الحس فالبيت ديالي وبحال الى شي حاجة كاتعيط ليا بسميتي ماللي كانقلب مكانلقا والو مشيت بغيت نهضر مع الوالدة نفهم منها اش واقع ولكن والو غير كاتشوفني كاتبكي، وصل الليل مشيت ننعس بلاصتي ولكن كلما بغيت ننعس كانشوف ديك القطة فالمنام كاتجيني كاتقمشني وتغوت وكاانفيق مخلوع، بقيت هكاك حتى قرب الصبح وهي تضربني الفيقة على الغوات ديال الوالدة نضت كانجري فيقت خويا قلت ليه يلاه نشوفو الوالدة مالها لقيتها مريحة فلارض وكاتبكي والوالد مسكين كايصبر فيها، شافتني وبدات تغوت وتقول انت السبب أنت السبب، صافي فديك الساعة حسيت براسي بااغي يطرطق عليا والله العظيم جا عندي الوالد قال لي خرج خليها ترتاح خرجت وماللي صبح الحال لقينا الواالدة مسكينة حالتها حالة كاتبكي وتقول لي علاش اولدي اش بغيتي ولاد عباد الله علاش وانا ما فاهم والو قلت ليها اشمن وااد اميمتي قال لي ديك القطة اللي قتلتي اش دااك ليها، وانا نتفكر ديك القطة و وتفكرت باللي لحتها فالفران بدم بارد ولكن ديك الساعة الاخوان كنت سكران ما واعيش واالله العظيم ما عارفش اش كاندير، المهم بقيت نقول للوالدة راني ما كنتش واعي وهي كاتقول فات الفوت اولدي فات الفوت..
دازت شي يامات والدار عندنا بدات تبدل وليت اللي هضرت معاه كايبغي يضارب معايا والوالدة ما بقاتش حاملة تشوفني، جتى جا عندنا واحد العم ديالي من البلاد وشاف ديك الحالة وهو يقول للوالد يجيب شي راقي يرقي الدار والوالدة قبل ما يفوت الفوت، وداكشي اللي درنا جبنا وااحد السيد الله يجازيه بخير غير دخل للدار وهو يقول لينا سدوا الشراجم وخرجوا الدراري الصغار وطلب من الوالد يخليني انا والوالدة ويبقى معانا هو باش يجيب اللي خاص،,,,,,,, يتبــــــــــع


الجـــــــزء التالــــــت وأخير : الواالد عاود ليه اللي وقع وكان كايظن انني مسكون ولكن العكس تماما حيث انا اتضح فالاخير انني ما كان فيا والو ما عدا الضربة ديال العين، بدا الففقيه يقرأ والوالدة مسكينة كاتغوت وكايخرجوا منها شي ااصوات فشكل وما حد الفقيه كايقرا وما حدها كاتغوت حتى بدا واحد الصوت ثقيل يتكلم منها، بدا يهضر معااه الفقيه وانا مصدوم ما عارف اش ندير بقيت غير حال فمي وعيني كايدمعو لديك الحالة وانا عارف ياللي انا السباب فيها، بدا الفقيه كايتكلم مع هكداك الصوت وهو كايجاوبو وقال ليه باللي غادي ينتاقم لولدوا اللي لحت فالعافية والفقيه كايحاول يبرر ليه ومرة مرة كاتجي الوالدة تجري لعندي كاتبغي تشنق عليا واالله العظيم بغيت نخرج فحالي والو الفقيه ما بغاش يخليني قال لي ريح بلاصتك، وبدا كايرقي عاوتاني وكايتكلم مع داكشي حتا زيروا مزيان وبدا يسولو شكون نتا واش بغيتي من هاد المرأة واشنوو جابك لهنا، جاوبو قال ليه ولدها قتل ولدي وانا غانقتلو الفقيه قال ليه باللي ما كنتش نقصد جاوبو قال ليه كذوب هو قتلو عن قصد ورماه فالنار انا ركابيا فشلو وبقيت نتسنا يهجم عليا فاي لحظة ويقتلني والفقيه كاايحاول معاه فالاخير زيرو بزاف وقال ليه عندي شرط واحد باش نطلقك تبعد على هاد العائلة وجمميع العائلات المسلمة، قال لي وحقي قال ليه حقك خديتيه ياك حيدتي ليه عينو قال ليه ما يكفييييييش مايكفييييييش، قال ليه واش انت مسلم قال ليه آآآآه انا مسسسسلم، وهو يتلوا عليه الأية وإن تعفو وتصفحوا الى اخرها،
والله الى بمجرد ما كمل الفقيه الاية جاوبو هداك قال ليه اشهد الله اني سمحت ليه في سبيله سبحانه، والله الى كانسمع داك الكلام وكانبكي بالجهد حيث عارف تكتاب ليا عمر جديد، بقا معاه داك السيد حتى خرجوا وفاش بغا يخرج عيط ليا بسميتي قال لي سير يا ولد ...... راك معفي هكا بهاد اللفض وتحل الباب ديال البيت وتسد،
جا عندي الفيه قال لي على سلامتك اولدي وعلى سلامة امك وبدا ينصحني ويطلب مني نتقي الله، والله ما تسوقت ليه بقيت غير كانشوف فالوالدة غير فااقت جريت عندها وبديت نبوس راسها ويديها وكانطلبها تسمح ليا وهي مسكينة ما فاهمة والو..
هادشي وقع ليا هادي 3 سنين الخوت والحمد لله كتاب ليا عمر جديد بفضل سيدي ربي وداك السيد..
وكانتمنى تبعدوا من مخلوقات الله وماتأذيوهاش راه الدنيا مخلطة وما فيهاش غير حنا.. كيف جاتكم القصـــــة