قصة بالدارجة المغربية : زهرة والحب الاول

قصة بعنوان زهرة والحب الاول
نقدم ليكوم راسي بعدا، انا سميتي زهرة عندي دابا 24 سنة ، مزوجة وعندي ولد سميتو امير عندو 5 شهور ، و عايشة حياتي بشكل عادي و فسعادة الحمد لله ، مزوجة براجل زوين بزاف عمري كنت نحلم نتزوج بيه ، هو ماشي مغربي لبناني ههه دابا تعرفو عليه من بعد ، غادي نبداليكوم ليكوم قصتي ، هادشي داز عليه 5 سنين يعني منين كان عندي 19 عام ، كنت كنقرا فالجامعة العام الثاني ، انا لبقيت فدار مع ماما و بابا حيت خواتاتي بجوج تزوجوا ، مهم انا من النوع لي الضحكة مكتفارقوش ديما دايرة الاجواء فالدار واخا غير بوحدي ، عمر شي حاجة مكانت كتخليني نبكي ، واليديا مفتاخرين بيا حيت كنقرا مزيان و عامري سقطت ديما كنجي من الاوائل ،و لي كنحل عليها فمي كتحضر واخا حنا على قد الحال ، ولكن الحمد لله عايشين مزيان معندناش ومخصناش ، انا يله درت الفولار حيت بابا كان باغيني نديرو و حتا انا تقتانعت بيه الصراحة حيت هو سترة للبنت خصوصا مع هاد الوقت لي كثروا فيه الكواريث ، مهم انا ماشي نقولكوم شي وحدة دايرة عقلها ههه، دايرة الزبايل ، تصاحبت مع بزاف كولا شهر عندي واحد ، منين كنت كنقرا ف الاعدادي وانا هاكا و لكن عمر شي حد قرب مني ولا حط يديه عليا كنت عارفة حدودي ، فاش كنشوف القادية بدات تحماض، كنسلت بجلدي و كنسالي ،و نزيدكوم عمري بغيت شي واحد ، حيت الشخص لي كنقلب عليه ملقتوش ، ويمكن مكينش ، كلشي كيقولي نتي عايقة بزاف كتخلي الدري يبغيك و تزيدي و هادشي ماشي غير واحد ولا جوج ، ههه بزاف و لكن انا كان كيعجبني الحال كنتلذذ و وحداخور كيتعذب ....شريرة ياكو! و لكن هاد الصلابة لي فيا و العياقة غادي تمشي ، نهار لي غادي نتعرف على ياسر ، ياسر كبر مني ب عامين ولكن كان قدي قدو فالقراية ، تعرفت عليه فاش كنت فالباك ، انا كنت نتاقلت من ليسي ديالي ل ليسي لي كيقرا فيه حيت كانت عندي واحد الظروف داكشي علاش نتاقلت ، مهم فاش بدات القراية مكنت كنعرف حتى واحد كلشي جديد عليا ، بديت كنكون صداقات ، و تعرفت على واحد البنت سميتها حنان كانت مسخوطة مكتحشمش لي فقلبها على لسانها ، وليت انا وياها صحابات ، و كيف العادة التنقل من شخص لآخر ، تصاحب مع هاذا سالي مع هاذا ، جا النص دالعام ، واحد النهار قاتلي صابتي حنان بلي كاينة واحد الرحلة لآزرو و سولاتني واش نمشي ، سولت ماما و بابا و بغاو حيت انا ديما كنمشي فالرحلات ديال المدرسة ، مهم جا داك النهار و هو النهار لي غادي يخلي الاثر الكبير فحياتي ، مشينا ركبنا فالكار غاديين ناشطين و ضاحكين ، و لاحظت بلي كاينين بزاف ديال الناس مكنعرفهومش و قررت نتعرف عليهم ، حيت انا من طبعي اجتماعية.

الجزء الثاني : بديت كنجبد الهدرة مع واحد الدري زوين وعجبني بزاف كان سميتو أمين ، بقينا مجمعين شحال و فاش نزلنا من الكار بقينا بجوج ، و شوية جات عندنا حنان و كي شافتو تزعطات فيه المسخوطة ، جراتني وبقات عليا (ها العار الى ما خليه ليا عجبني بزااف مييمتك ميمتك ) ههه حمقة انا صافي عندي عادي ، حنا هاكاك جاو صحابو و تعرفنا عليهم و كان ياسر واحد منهوم ، كان طويل و عندو العضلات و شعرو كحل و عندو لحية خفيفة ، مهم مبيهش ، بقينا النهار كامل و انا و حنان معاهوم متفرقناش ، قولها و ضحك عليها ، حنان جرات امين و بقاو كيتمشاو ، و انا بقيت غاية بوحدي ، شوية وانا نحس بالزطيم مورايا شي واحد ضربلي فظهري ، آه ياسر ، بقينا حتى حنا كنتمشاو و كنهدرو ، تعارفنا على بعضياتنا مزيان وعاودتلو على حياتي و هو كذلك ، صافي سالات الرحلة وحنا دابا راجعين ، الطريق كاملة و هو يشوف فيا حتى حشمت و بديت نضرب اللوان ، تما عرفتو بلي معجب بيا و انا كذلك ، هو نزل قبل مني و جا باش يسلم عليا و هو يعتيني سنسلة ديال اليد فيها الحرف لول من سميتو y ، قالي خليها عندك سوفونير ، و طلب نمرتي و انا طبعا عطيتهالو بدون تردد و مشى .

الجزء الثالث : دارت الأيام و انا و ياسر ولينا نتلقاو كل نهار صبح و عشية ، حتى تصاحبنا هههه كانت باينة ، فاش تصاحبنا كان كيديرلي كيف الماء القليل ، حاطني فعينيه ، و حسين بيه بلي كيبغيني من نيتو ، بقيت معاه 3 شهور و هاد المرة طولت ماشي من عادتي ، و بديت نحس بالملل من هاذ العلاقة ، واخا هو كان مزيان و عمرو طلب مني ندير معاه شي حاجة ، كان كيقولي نتي ماشي ديال داكشي ، و لكن انا كيف ديما كنهز راسي و كنساحب ، باقيا عاقلة النهار لي قوتلو سالينا ، بقا غير ساكت و مشى و خلاني واقفة ، سيمانا مبقى يجي يقرا ، و فاش سولت أمين عليه قالي هو بغاك من نيتو ، ولكن نتي مصدقتيش ، و قالي هادي هي حالته منين كيكون طالع ليه الدم كيغبر شي يامات و عاد كيولي ، صافي بقيت كنأنب فراسي و من بعد قلت ، ( ايوا صافي ا زهرة نتي سوقك و يموت گاع نتي مدرتي والو هو لي بغاك آش داه يبغيك ) ، جات ايام و مشات ايام و ياسر مبانش ، واحد النهار فستراحة انا غاديا و كنشوفو هو و امين ، مشيت عندهوم ، سلمت عليه و قوتلو بغيت نهدر معاك ، انا: شوف اياسر سمحلي بزاف على داكشي لي درت ولكن انا...!قاطعني : صافي ازهرة نساي لماضي ، و نبداو صفحة جديدة . انا: ماكد؟؟ ياسر: وي ماكد ، صافي نبقاوامي !؟ اناباستغراب: اوكي . صراحة فرحت حيت تصرف هاكا و موقع حتى مشكل ، و لكن كيفاش كيتصرف بهاد البرودة مفهمتش ، مهم ماشي سوقي ضميري رتاح دابا ، اما واحد حنان مسكينة تصدمات فامين مشات قاتلو كنبغيك ، و هو صدق كيبغي شي وحدة ههههه نهار و مطال و هي تشكي و. تبكي عليا .

الجزء الرابع : سالات القراية و نجحنا فالباك الحمد لله ، و انا و ياسر ولينا اصدقاء ، وخا بعض المرات كتبان عليه بلي باقي كيبغيني غير من غيرتو الزايدة عليا ههههه ، و مع انا شريرة كنت بلعاني كنبغي نفقصو ، فالصيف مبقيناش تلاقينا ،كنت كنهدرو مرا مرا ، حتى لول دالعام ديالنا فلافاك ، فاش شفتو بقيت مصدومة زيان و زاد صحاح و لحية كبرات شوية ، كانت حدايا حنان كانت كتهدر معايا و انا ماشي فهاد العالم ،حتى جمعات معايا ب واحد القرصة ، آيييييييييي حشومة عليك احنان زرقتيلي لحمي .حنان : و نتي لي فين ساهية و حالا فمك عييت منهضر معاك ووالوا. انا: آح ، اميييمتي قلبي مشا فيها يا حنان . حنان : علاش مالكي . انا: يييي....ياسر أختي شوفي كي ولا . حنان : فين ، !! وهضري دغيا .انا : راه موراك ،شافنا و جاي لعندنا مديريش دورة ديال طوبيس ، حنان : هههههههه واخا. حنان دارت بشوية منين شافتو دارت كثر مني حتى جمعت معاها بقرصة حتى هي ، حنان: اهيييا ناااااري واش بصح هاذا ياسر وااااااااع ولد الحرام كي ولا ، انا : شفتي اختي شفتي اهئ أهىئئ تبااا على زهري المكفس ...

الجزء الخامس : وقف علينا ياسر و معاه أمين حيت داك الجوج مكيتفارقوش ، بحالي انا و حنونة ، سلمو علينا لاباس لاباس و هدرنا شوية ومشاو بحالهم ، و بقييت انا بحالي ضارباني مقلة غير مبلقة و كنفكر ، حنان: ياك لاباس اداك البنت منين شفتي داك المتعوس و نتي مبلوكيا !! انا: اودي خليني ساكته ، معرفت شنو وقعلي ا حنان عمري جربت هاد الإحساس ، هو واقف كيهضر و انا رجلي كيغزلوا و شداتني سخفة . حنان : ههههه حمقة غير منين شحال هادي مشفتيه و لكن صراحة زيان بززااف ماشي بحال داك الماسخ ديال أمين كان ماسخ وزاد كمل تفوووو! .انا: واقيلا مصاب يكون غير هادشي ، الله يدير لي فيها الخير و صافي. مشيت للدار دخلت نيشان لبيتي ، و بديت نفكر فياسر و التغيير لي وقع و بدات تجيني شي أفكار ، حتى ضربتها بواحد النعسة حتى ل6 دالعشية ، فقت و بقيت كنقول صافي ازهرة غير الوحش و الولف هو لي دايرلك هاكا نساي و متبقايش تفكري . مهم دارت الأيام و بدات القراية فلافاك و ياسر و امين جاو معانا حيت دارو نفس الشعبة لي درنا انا و حنان ، ولينا مكنتفارقوش ، ولكن جاني تبدل بزاف حتى من الداخل ديالو حطيتي ولد و هزيتي ولد ، ولا مكبر و عاجبو راسو و كيبقا يعاود ليا على البنات لي كيتفلا عليهم كل وحدة و شنو كيدير ليها ، و كيتصاحب مع 4 ،5 فدقة وحدة ، ميمكنش يكون هادا ياسر الحنين و الظريف لي عرفت ، واحد النهار كان واقف مع شي وحدة ، منين شفتو معاها بحالي حطيتيلي شي حجرة على قلبي و مقدرتش ندخل الحصة و مشيت للدار ، و بقيت نفكر ، شوية و هي تجي عندي حنان قالتلها ماما راها فبيتها ، دخلات عندي، حنان: دخلنا عليك بالله فين غبرتي قلبت عليك ملقيتك!! انا: حسين برأسي عيانة و انا نهبط بحالي مقدرتش نبقى، حنان: لا لا نتي ماشي زهرة لي كنعرف وليتي غير مغوبشة و طالعة ليك القردة ياك ماااا ! انا: شنوو ؟ حنان : اوييليي كتحبيي هههههه لا صافي نتي كتحبي.انا: حمقة نتي عارفاني قلبي قاصح و ماشي ساهل باش نبغي و اصلن عمري جربت هاد الإحساس و مبغياش نجربو، حنان: اشوفي اداك البنت والله حتى كتحبيه و باينة عليك داك الحركات ماشي عليا .انا: اووووف و صافي احنان آه آآه انا وليت كنبغيه صافي تهانيتي ولكن هو ولا حاسبني بحال ختو و نساني و اصلن مابقاش ياسر لي كنعرفو ..... و عطيتها لبكا و حنان كتسكت ، العام كامل و انا فديك الحالة و نهار على نهار وليت نبغيه و جربت نار الحب ، و لكن مكانش عندي الجرأة باش نقولو كنبغيك ، حيت غادي يقولي فين كنتي شحال هادي ، صافي بردتها و سكت و قلت اللهم نبقا حداه واخا غير اصدقاء ولا نخسروا فمرا.

الجزء السادس: داز العام الاول و العام الثاني هادا و انا كيف ما انا ، باقية مزعوطة فالعوج بغيت نقول الغزال دياسر،حنان لي كتبرد عليا شوية تخطبات المسخوطة و مبقاتش تجي عندي بزاف ، و وليت دايرة بحال شي وحدة ميت ليها الراجل ، التعاااااسة للأبد و الندم حيت كان واحد النهار بين يدي و انا لي خليتو ، يا ليت تلك الأيام تعود يوماا ، و لن اتركه مهما كان ، الصق فيه لصقة المسكة بالصوف (الشعر)هههههه، الهم كيضحك ، و هو ما شاء الله عليه غير من وحدة لوحدة و انا ختي زهرة يخوليك الجناب يا ربي . قربات الامتحانات و انا مدياها لا فقرايا لا فوالو غير ياسر لي فبالي و خيالي ،اووووف صافي والله حتى نهضر و نقولو لي ف قلبي و لي بغا يوقع يوقع ، اوااه غادي نطرطق الى بقيت هاكا ، تشاورت مع حنان و حتى هي قاتلي يقدر يكون باقي كيبغيك غير مكيبينش و صافي . فقت واحد الصباح لبست مزيان و تزوزت و خرجت مشيت لافاك و بديت نقلب عليه حتى لقيتو ، جريتو لواحد القنت و قوتلو بلي عندي شي حاجة بغيت نقولها ليك ، ياسر : اوك !تفضلي هانا كنسمعك . بدات طلع معايا سخونية و كنرجف ، سكت و واحد اللحظة قوتلو: يياسر انا معرفتش شنو وقعلي باش وليت هاكا و لكن انا يمكن....يمكن ولييت كنبغيك !!! وغمضت عيني ،سمعتو كيضحك بصوت عالي وقالي كاميرا كاشي ؟؟ ، الله يهديك واش انا باين فيا كنضحك . سكت مبقاش كيضحك ، شدا او اللقوة هههه ، قالي كيفاش هادشي ، عاودتلوا لي كاين ، وقالي دابا شنو المعمول قوتلو من عندك ، قالي ساهلة نرجعو ، اوااااه تصدمت متوقعتش و لكن فرحت و وافقت داك الساعة ، رجعت للدار غادي نطير بالفرحة ، و عيطت لحنان جات عندي و عاودت ليها ، و حتى هي فرحات ،حنان : فرحت ليك بزاف و الله ،و لكن أجي نسولك ماشي كان قالك بلي ولا يبغي شي وحدة واش نساها !؟ ، اه نسيت مقوتلكمش بلي كان عاودلي على شي وحدة تعرف عليها و هي ماشي فالمغرب عايشة فالمانيا و ولا كيبغيها و كيوريني تصاورها، الصراحة هي زوينة حسن مني بزاف و لاباس عليها ،و لكن قلت بلي هو ديما هاكا يعني غير عاجباه و صافي و دبا ينساها، و نسيت الموضوع. مهم نرجعوا لحنان ، نن مكنضنش احنان كون كان كيبغيها ميرجعش معايا ، انا الفرحة عماتلي عيني و نسيت كولشي لمهم رجعت لياسر.

الجزء السابع: و اخيييييرا رجعات المياه لمجاريها ، هادي دابا 7 شهور باش رجعت انا و ياسر ، زدت تعلقت بيه كثر ولى هو النفس لي كنتنفسوا ، نجحنا وطلعنا للعام الثالث ، علاقتنا زوينة داكشي لي بغيت كولشي مزيان ، السعادة الأبدية .و لكن تجري الرياح بما لا تشتهي السفن ، قرب التالي دالعام و ختي لي عايشا فالامارات ، كانت وعداتني بلي فاش نسالي القراية غادي تديني عندها ،و نخدم تما بديت نوجد الوراق و حتى حد مفخبارو من غير حنان ، حتى ياسر مفخبارو والو ، خليت تا نقرب نمشي عاد نقولهالو ، و حتى هو غادي يمشي لالمانيا عند خوه ، يعني شي مغيسمح ف شي ،واااع فراقو غادي يكون صعيب بزاف محال واش نقدر نعيش بلا بيه ، جا الصيف لي غادي نمشي فيه باقيلي شهر و نص و نقلع، و جا الوقت باش نقولها لياسر، مهم هدرت معاه و قوتلو بغيت نشوفك ، حتى هو قالي بلي توحشني و بغا يشوفني ، قوتلو صافي نتلاقاو فالكافي ديال ديما ، و لكن هو رفض و قالي لأول مرة ، علاش متجيش عندي لدار راه كولشي مسافر نgلسو فخاطرنا انا ترددت فالأول و لكن فالتالي وافقت حيت كنت تايقة فيه .فقت فالصباح و قولت لماما بلي غادي نمشي عند حنان عرسها داك السيمانة و غنخرجو نتقداو ، وافقات ، لبست احسن معندي و ماكيت و قاديت و مشيت عندو ، بقينا gالسين كنهادرو ، وجدنا الغدا انا وياه و تغدينا بحال شي جوج مزوجين ، كنت طايرة بالفرحة ، شوية بدا يتقرب مني و انا مع عمري درت شي حاجة اول مرة ليا ، تخلعت و نضت ولكن بالكلمة الحلوة و داكشي غمضت عيني ومبقيت نحس بوالو، منين ضرباتني الفيقة لقيت الخمسة دالعشية و ياسر حدايا ناعس عريان (الله يا ربي شنو درت ، صااافي مشيت فيها اويليي شنو درتي ازهرة ) و كنضرب فوجهي سمعني ياسر وناض و بقى يسكت فيا وقالي متخفيش راكي باقية بنت ، و بدا يعنقني و انا عاطياها غيرللبكا، نضت لبست و بردت شوية ، و رجعت للدار حسيت بعذاب الضمير و لكن قلت الحمد لله لي باقيا بنت ، دازت لأيام و انا صراحة داكشي لي درت معاه زاد علقني بيه، و منقدرش نتخايل راسي مع غيرو.

الجزء الثامن: وليت تلاقيت بيه هاد المرة باش نقوليه بلي غادي نمشي عند ختي الإمارات ، تلاقيتا ف واحد الكافي ، حنا gالسين و هو ناض مشا الحمام ، وهو يجيه ميساج ، هزيتو ليقيتو جاي من للواتساب حليتو ، و انا نقرا سمية ديال ياسمين ، وانا نتفكر ايييييه ياسمين د ألمانيا ، والله تا نشوف فاش كيهدرو، حليت و يا ريتني ما حليت لقيتو كايسيفط ليها بلي باغي يشوفها حيت هي فالمغرب دابا ، و بلي توحشها و كيقولها انا كنبغيك و عمري نساك (الصدمة كانت قوية) بديت كنرجرف و نقفقف ، و هي جاوباتو باش يتلاقاها غدا فالعشية مع 4 فواحد الجردة ، حطيت التليفون و مسحت دموعي ، و درت راسي بحال موقع والو ، gلس و كملنا هدرتنا عادي و مقوتلو والو على السفر ديالي ، شوية هز التليفون و شاف الميساج ديالها و ابستم واحد الابتسامة ، و انا قلبي بدا بتقطع و لكن قلت حتى نشوف بعيني عاد نتيق ، رجعت للدار ليل كامل منعستش بقوة التفكير واش هادشي كامل كان زعما كيضحك عليا ميمكنش ، الهدرة و الوعود الله يا ربي نكون غير كنحلم ونفيق من هاد الكابوس. و اخييرا جا الوقت لبست و قاديت وخرجت مشيت لداك الجردة ، مع انا شايفة تصاورها اذا غادي نعرفها ، انا هاكاك و هو يبان ليا كحل الراس هو و امين ، تبعتهم تلاقو بيهم انا بديت نرجف ، كانت هي و شي وحدة ولاد الحرام موعد مزدوج ، بقيت موراهم و هوما غديين و الضحك ديالهم كيتسمع من بعيد ، عيطت ليه و جاوبني سولتو فينك و كانقول هادا الأمل الاخير عندي يا ربي ميكدبش و يقولي صراحة ، و لكن كذب و قالي انا مع امين فالقهوة بالطبع بعد عليهم باش متسمعوش لالا ياسمين كيكذب، صافي طحت للارض و بديت نشهق ، نضت و جمعت دموعي و مشيت باش نواجهو.

الجزء التاسع : مشيت وقفت قبالتهم شافني امين و نغزوا ، شاف فيا و بدا يضرب بالألوان ، صبرت قلبي و مشيت سبيت و عايرت ، ياك هادي هي كاتبغيني و الهدرة الزوينة و خليتيني ندير لي عمري دروتو ، شنو ذنبي الى بغيتك ، شنو درت ليك علاش ضحكتي عليا ، منين كتبغيها علاش عطيتيني امل ، مهم خرجت لي فقلبي و فالتالي عطيتها للبكا و هو غير ساكت ، اخر حاجة جريتو و وقفتو حداها و قوتلهم مواتيين الله يكمل عليكم بالخير ، و عمرك باقي تشوف هاد الوجه فحياتك ، و مشييت كنبي و قلبي كيتقطع ،تبعني امين كيسكت و قالي نتي السباب نتي لي سمحتي فيه فالأول وهو بغا يعطيك درس باش عمرك تنسايه ، اما هو دبا مكيبغيكش كيبغي ياسمين و نتي نساك من شحال هادي دبا جربي العذاب لي عذبتيه و دوقي نفس الألم ، بقيت كنشوف فيه و جاني انهيار عصبي بقييت غير كنغوت و نضرب فامين حتى سخفت ، جا ياسر و داك العوجة و هزوني لطبيب ، بقيت ساعتاين و انا معلقة السيروم و منين فقت لقتو قبالتي ، جريت عليه و نترت السيروم وخرجت معرفاش راسي فين غاديا ، انا تندار بيا و انا لي كنت كنديرها بكولشي و كنهدر بحال شي حمقة ، رجعت للدار حالتي حالة ، دوشت و نعست ، منين فقت قررت بلي عمر شي حد ميعاود يدخل لحياتي غادي نحيد قلبي و ندير فعاوطو حجرة صم ، بدلت النمرة ديال التلفون ، حيدت الفايسبوك الاستغرام ، كولشي باش حتى حد ميعرف شنو وقعلي ولا فين مشيت بالاخص ياسر، حضرت للعرس ديال حنان و عاودت ليها كولشي ، و بقيت فيها و وصيتها باش متقول لحد فين مشيت ، جا الوقت ودعت حنان و عائلتي و هزيت شانطتي و خويت ، الطيارة قلعات و مبقاتش شفت موراية و قررت باش منرجعش حتى دوز عاماين.

الجزء العاشر: وصلت للإمارات وا ناري كدايرة جنة على وجه الارض ، استقبلاتني ختي ، و gلست معاها قلبت على خدمة ، و لقيتها فواحد البوتيك ديال الحوايج دالرجال ، فالحسابات ، بديت الخدمة و وليت بحال شي حجرة منالخدمة للدار و من الدار للخدمة حتى الصحابات مدرتهومش، و الويكاند كنت كنخرج نgلس حدا البحر و نبدا فالذكريات و الآلام و الاوجاع ، و نبكي و نرجع ، بقيت فداك الحالة لمدة 8شهور ، حتى لواحد النهار ، دخل واحد الزبون للمحل شرى الحوايج و جا خلص ، و انا مشكيلتي حتى فالخدمة ديما مغوبشة ، مهم عطيتو الفاتورة و مشى بحالو ، ولى كل نهار يجي الله يجعلو يشري كرافاطا هههه ، واهيا ناري طلعلي فراسي ، و واحد الصباح انا غالسة وهو يدخل ، مستغربتش حيت ولا يجي كل نهار ، ولكن هاد المرة ماشرى والو جا عندي وقالي بلي بغى يتعرف عليا ، انا مقبلتش و جريت عليه ، و بدا كل نهار يجي بلاما يشري غير يعرض عليا وانا نجري عليه ، والبنات لي معايا كيعايرو فيا ، و لكن انا الدقة اللولة باقيا كتحفر فيا ، عمر داود ليعاود، واحد الصباح مجاش معرفتش شنو وقعلي و انا نهار كامل و انا حاضيا الباب غير فوقاش يدخل ، مجاش ، اوووووف يا ربي كون غير هدرت معاه ندمت الصراحة، والبنات بقاو يضحكو عليا ،دازت 3 ايام و والو واش بان صافي قطعت الامل ، عاوتاني مجاش خرجت من الخدمة مشيت للدار كيف العادة ، و هي ختي تلاقاني بالزغارت ، اوييلي آش كاين ياك ما حاملة عاوتاني، نتي غاتبقاي غير تبزي هههه ، ختي : الا يالهبيلة الزغارت ليك ،انا: علاش ليا يك لاباس ؟؟ ختي: هههه جاوك الخطاب ، اووو الصدمة كيفاش الخطاب و انا مختفية مكنبانش للباشار gاع ، قلت يمكن شي صاحب راجل ختي ، ولكن الصدمة الكبرى هي منين دخلت ، يخخخخ داك وجه النحس لي هادي شحال مشفتو، هادا كيدار عرف فين ساكنا !! مهم هو gلست وبدا يهضر بالبنانية وانا كتغلبني الضحكة ، عرف على راسو ، سميتو اياد فعمرو 29 عام ، لبناني الأصل و عايش فالامارات ، داير بحال شي لعاب ديال البوكس ،الطولة والفرمة والزين والعينين خوضروالشعر كحل والحية كحلة ، كيحمق ،عندو صالة ديالgym ، معدورو منحوت . أواه منين كان كيجي عندي مكانش كايبانلي هاكا دابا عاد فصلتو مزيان.

الجزء الأخير : بقينا كنهدرو وطلب من ختي باش نخرجو ، وخرجنا وهدرنا وتعرفنا مزيان ، وسولتو زعما هو داك الزين كامل شنو عجبو فيا ، قالي بلي فاش رفضت الخروج معاه ، حسبليه عندي علاقة مع شي حد و بقى كيتبعني هادي كثر من شهر و عرف بلي من الدار للخدمة يعني مكنمشي لحتى شي بلاصة، و هادشي هو لي خلا الاعجاب يزيد و هو كان كيقلب على شي وحدة بحالي ، و زيادة على هادشي دايرة الفولار حيت عائلتو محافظة شوية ، دازت الأيام و انا و اياد تخطبنا وقررنا باش نديرو العرس فالمغرب و بالفعل جئت المغرب من بعد عامين ، تفكرت فاش ركبت فالطيارة وانا قلبي كولو الم و حقد ، و دابا راجعة و انا فسعادة مكتوصفش ، عاودت لاياد على داكشي لي وقعلي و هو مغضبش حيت صارحتوا و قالي نساو الماضي ، مهم جينا المغرب و دارولينا استقبال زوين من بعد أسبوعين درنا العرس ، و جات عائلتو حتى لهنا ، دوزنا شهر العسل فاكادير حيت أياد بغا يتعرف على مدن المغرب ، سالى شهر العسل و ياريتو ما سالا ههههه ،رومانسي بزاف وكيبغيني فجميع حالاتي هذا هو الحب الحقيقي لي من بعدالزواج والحلال ، رجعنا لمدينتي باش نودع عائلتي باش نرجع الإمارات ، واحد العشية خرجت انا و راجلي العزيز و شداليه فيديه ، حتى جا وجهي فياسر ولا حالتو حالة ضعاف ، يعلم الله شنو وقعلو ، بقا كيشوف فيا انا و اياد ولكن انا درت راسي معرفتوش حنيت راسي وزدت ، اه حنان صاحبتي كانت قاتلي بلي كان كيحاول يوصل ليك حيت ندم عليك بزاف ، وهاديك ياسمين قاتلو اناعمري نبغيك حيت كتبغي وحداخور، ولكن هادشي كامل مكيهمش دابا ، حيت انا نسيتو فمرة ، و الحب دحياتي دابا هو اياد وولدي امير هوما نور عينيا، و يكذب عليك الكذاب لي يقولك (القلب بيعشق بالعمر مرة) انا بغيت ياسر ، و دابا بغيت اياد و ياسر معندوش بلاصة فقلبي ، داكشي علاش الإنسان خاصوا ميفقدش الامل ، و لي مكتبهالك الله هي لي غادي تكون مهما درت ومهما فعلت و عمر الدنيا متوقف على واحد..............النهاية.