.
ﻣﻠﻲ ﻋﻤﺮ ﻭﻟﺪﻱ ﺩﺧﻞ ﻟﺒﻴﺖ ﺧﻮﺍﺗﺎﺗﻮ ﺅ ﻓﻴﺪﻭ ﺷﺎﻗﻮﺭ ﺳﻴﻄﺮ ﺳﻜﺎﺕ ﻋﻠﻰ
ﺍﻟﻤﻜﺎﻥ ﻣﻠﻲ ﺧﺮﺝ ﻣﺎ ﺻﺪﻗﺘﺶ ﻋﻴﻨﻴﺎ
ﺧﺮﺝ ﻫﺎﺯ ﻓﺈﻳﺪﻳﻪ ﺭﻳﻮﺱ ﺧﻮﺍﺗﺎﺗﻮ ﻣﻘﻄﻮﻋﻴﻦ . ﺣﺴﻴﺖ ﻓﺪﻳﻚ ﺍﻟﻠﺤﻈﺔ ﺑﻠﻲ
ﻗﻠﺒﻲ ﺅ ﺭﻭﺣﻲ ﺅ ﺍﻟﺰﻣﻦ ﺅ ﻛﻠﺸﻲ ﺗﻮﻗﻒ ﺑﻘﻴﺖ ﺍﻧﺎ ﺅ ﺃﻣﻴﻨﺔ ﺅ ﻋﻤﺮ ﻓﺪﺍﺭ ...
.
ﻣﻦ ﺑﻌﺪ ﻧﺴﻤﻊ ﻣﺮﺍﺗﻲ ﺃﻣﻴﻨﺔ ﺗﻘﻮﻝ ﺃﻧﺖ ﺍﻷﺧﻴﺮ . ﺃﻧﺖ ﺍﻷﺧﻴﻴﻴﻴﻴﺮ ..
ﺷﺎﻑ ﻓﻴﺎ ﻭﻟﺪﻱ ﻋﻤﺮ ﺅ ﻫﻮ ﺇﻃﻠﻖ ﺭﻳﻮﺱ ﺧﻮﺍﺗﺎﺗﻮ ﺗﺤﺖ ﺻﺪﻣﺔ ﻛﺒﻴﺮﺓ ﻣﻨﻲ .
ﻣﻦ ﺑﻌﺪ ﻫﺰ ﻟﻴﺪ ﻟﻲ ﻓﻴﻬﺎ ﺍﻟﺸﺎﻗﻮﺭ ﺅ ﻫﻮ ﻳﺘﻴﺮﻳﻪ ﻟﻴﺎ ﻣﺒﺎﺷﺮﺓ ﺟﻴﻪ ﻭﺟﻬﻲ
ﻛﺎﻳﺒﺎﻥ ﻟﻴﺎ ﺍﻟﺸﺎﻗﻮﺭ ﺟﺎﻱ ﻛﺎﻳﺪﻭﺭ ﺅ ﻏﺎﺩﻱ ﺅ ﻛﺎﻳﻘﺮﺏ . ﺣﺘﺎ ﺑﻘﺎﺕ ﺑﻴﻨﻲ ﻣﻌﺎﻩ
ﺷﻲ ﻣﺘﺮﻭ ﺅ ﻧﺺ ﺅ ﻫﻲ ﺗﻘﻮﻝ ﺣﺒﻴﺒﺘﻲ ﺃﻣﻴﻨﺔ ﻻﺍﺍﺍﺍﺍﺍﺍﺍﺍﺍﺍ . ﺑﻤﺠﺮﺩ ﻗﺎﻟﺘﻬﺎ
ﻛﻠﺸﻲ ﺗﻮﻗﻒ . ﺍﻟﺰﻣﻦ ﺣﺒﺲ . ﺷﺎﻗﻮﺭ ﺑﻘﺎ ﻣﻌﻠﻖ ﻓﺎﻟﻬﻮﻯ ﺅ ﻛﺎﻉ ﺩﻧﻴﺎ
ﺗﺒﻠﻮﻛﺎﺕ ﺗﺎ ﺷﻲ ﺣﺎﺟﺎ ﻣﺎﻛﺎﺗﺤﺮﻙ . ﺅ ﻫﻲ ﺗﺠﻲ ﺑﻴﻨﻲ ﻣﻌﺎﻩ ﺅ ﻋﺎﻭﺩ ﺗﺮﺧﺎ
ﺍﻟﻮﻗﺖ ﺅ ﻫﻮ ﻳﻜﻤﻞ ﺍﻟﺸﺎﻗﻮﺭ ﻃﺮﻳﻘﻮ ﺅ ﺿﺮﺏ ﺃﻣﻴﻨﺔ ﻓﺎﻟﺮﺍﺱ ﺅ ﻭﺣﻞ ﻟﻴﻬﺎ
ﻓﻮﺟﻬﻬﺎ .
ﺣﺴﻴﺖ ﺑﻌﻀﺎﻣﻲ ﺑﺤﺎﻝ ﺇﻟﻰ ﺗﻔﺮﻗﻮ ﻓﺪﻳﻚ ﺍﻟﻠﺤﻈﺔ ﻃﺎﺣﺖ ﺃﻣﻴﻨﺔ ﺅ ﻃﺤﺖ ﺣﺘﻰ
ﺍﻧﺎ ﻣﻌﺎﻫﺎ ﻣﺸﻴﺖ ﻫﺰﻳﺘﻬﺎ ﻧﻌﺴﺘﻬﺎ ﻓﺤﺠﺮﻱ ﺅ ﻧﺒﻜﻲ ﺅ ﻧﻘﻮﻝ ﻻﺵ ﻫﺎﺩﺷﻲ
ﻻﺍﺍﺍﺍﺵ ﺷﻨﻮ ﺩﺭﺕ ﺃﻧﺎ
ﺑﺪﺍﻭ ﺩﻣﻮﻋﻲ ﺇﻳﻄﻴﺤﻮ ﻋﻠﻰ ﺃﻣﻴﻨﺔ ﺅ ﻫﻲ ﺗﺒﺪﺍ ﺗﺤﺮﻙ ﺅ ﻧﻘﻮﻝ ﻟﻴﻬﺎ ﺗﺸﺠﻌﻲ ﺁ
ﺃﻣﻴﻨﺔ ﺗﺸﺠﻌﻲ ﻋﺎﻓﺎﻙ ﺣﺒﻲ .
ﺑﺪﺍﺕ ﻛﺎﺩﻭﻱ ﻣﻌﺎﻳﺎ ﻭﻟﻜﻦ ﺑﺼﻮﺕ ﺭﺟﻞ ﺅ ﺗﻘﻮﻝ ﻟﻴﺎ ﻋﻼﺵ ﻛﺎﺗﺒﻐﻲ ﻭﻻﺩﻙ ﺅ
ﻣﺮﺍﺗﻚ . ﻋﻼﺵ ﻛﺎﺗﺒﻐﻲ ﺍﻟﺴﺒﺐ ﺍﻟﺮﺋﻴﺴﻲ ﻓﺎﻟﻔﺘﻨﺔ ﺗﺎﻉ ﺍﻟﻌﺎﺋﻠﺔ . ﻗﻠﺖ ﻟﻴﻪ
ﺷﻜﻮﻥ ﻧﺘﺎ ﺅ ﺁﺵ ﺩﻳﺮ ﻓﺪﺍﺭﻱ . ﻗﺎﻝ ﻟﻴﺎ ﺃﻧﺎ ﻟﻲ ﺧﺼﻨﻲ ﻧﺴﻮﻟﻚ ﻫﺎﺩ
ﺍﻟﺴﺆﺍﻝ . ﺃﻭﻻ ﺑﺎﻏﻲ ﺍﻟﻜﻨﺰ ﺩﻳﺎﻟﻲ؟
ﻗﻠﺖ ﻟﻴﻪ ﺃﻧﺎ ﺑﺎﻏﻲ ﻏﻴﺮ ﻭﻻﺩﻱ ﻋﺎﻓﺎﻙ ﻭﻻﺩﻱ ﺅ ﻣﺮﺍﺗﻲ . ﻋﺎﻓﺎﻙ . ﻗﺎﻝ ﻟﻴﺎ
ﻫﺎﻫﺎﻫﺎ ﻭﻻﺩﻙ ﻧﺴﺎﻫﻢ ﺅ ﺍﻟﻜﻨﺰ ﺣﺘﻰ ﻫﻮ ﻧﺴﺎﻩ . ﻗﻠﺖ ﻟﻴﻪ ﺷﻮﻑ ﻋﺎﺭﻑ
ﺍﻟﻘﺼﺔ ﺩﻳﺎﻟﻚ ﻭﻟﻜﻦ ﺃﻧﺎ ﻣﺎﻋﻨﺪﻱ ﺣﺘﻰ ﺷﻲ ﺩﻧﺐ ﻓﻴﻬﺎ ﺅ ﻣﺎﺑﻐﻴﺖ ﺣﺘﻰ ﺷﻲ
ﻛﻨﺰ ﻋﺎﻓﺎﻙ . ﻗﺎﻝ ﻟﻴﺎ ﻣﺎﻛﺎﻳﺒﻐﻮﻛﺶ ﻭﻻﺩﻙ ﺅ ﻣﺮﺍﺗﻚ ﻋﺮﻑ ﺑﻠﻲ ﺭﺍﺳﻚ ﺛﻢ
ﺭﺍﺳﻚ .
ﻗﻠﺖ ﻟﻴﻪ ﻛﻮ ﻣﺎﻛﺎﻧﺘﺶ ﻣﺮﺍﺗﻲ ﻛﺎﺗﺒﻐﻴﻨﻲ ﻛﺎﻉ ﻣﺎﺗﺤﻤﻴﻨﻲ ﻣﻦ ﺍﻟﺸﺎﻗﻮﺭ ..
ﺑﻘﺎ ﺩﺍﻙ ﺟﻦ ﺳﺎﻛﺖ ﺗﺎﻝ ﺷﻮﻳﺎ ﺅ ﻗﺎﻝ ﺑﺼﺮﺍﺣﺔ ﺳﺘﻐﺮﺑﺖ ﻛﻔﺎﺵ ﻣﺮﺍﺗﻚ
ﺗﻐﻠﺒﺎﺕ ﻋﻠﻰ ﺍﻟﺴﻴﻄﺮﺓ ﺩﻳﺎﻟﻲ ﻋﻠﻴﻬﺎ ﺑﺸﻲ ﺣﺎﺟﺎ ﻣﺎﻋﺮﻓﺘﺶ ﺷﻨﻮ ﻫﻲ .
ﻗﻠﺖ ﻟﻴﻪ ﺍﻟﺤﺐ ﻫﺬﺍﻙ . ﻫﺎﺫﺍﻙ ﺳﻤﻴﺘﻮ ﺍﻟﺤﺐ .
ﺷﻮﻳﺎ ﺑﺪﺍ ﻛﺎﻳﻐﻮﺕ ﺅ ﺑﺪﺍﻭ ﺍﻟﺒﻴﺒﺎﻥ ﻛﺎﻳﺘﺤﻠﻮ ﺅ ﻛﺎﻳﺘﺴﺪﻭ ﺑﻮﺣﺪﻫﻢ ﺅ ﻛﺎﻳﺒﺎﻥ ﻟﻴﺎ
ﻭﻟﺪﻱ ﻋﻤﺮ ﺷﺪ ﺭﺍﺳﻮ ﺅ ﻃﺎﺡ ﻓﺎﻷﺭﺽ ﺅ ﺑﺪﺍ ﻛﺎﻳﻐﻮﺕ ﺣﺘﻰ ﻫﻮ ﺷﻮﻳﺎ ﺑﺪﺍﻭ
ﺍﻟﺒﻴﺒﺎﻥ ﻛﺎﻳﻄﻴﺮﻭ ﻓﺪﻭﺍﻣﺔ ﺑﺤﺎﻝ ﺍﻟﺰﻭﺑﺎﻋﺔ ﺅ ﻗﺎﻝ ﻟﻴﺎ ﺩﺍﻙ ﺟﻦ ﺳﻤﻌﻨﻲ ﺑﻨﺎﺗﻚ
ﻣﺎﺗﻮ ﺅ ﻣﺮﺍﺗﻚ ﺣﺘﻰ ﻫﻲ ﻣﺎﺗﺖ ﺃﻧﺎ ﻟﻲ ﻣﺤﻜﻢ ﻓﻴﻬﺎ ﺩﺍﺑﺎ ﻳﻌﻨﻲ ﺑﻘﻴﺘﻲ ﻧﺘﺎ ﺅ
ﻭﻟﺪﻙ ﻓﻘﻂ . ﺅ ﻋﻨﺪﻙ ﺟﻮﺝ ﺍﺧﺘﻴﺎﺭﺍﺕ ﻳﺎ ﺇﻣﺎ ﺗﺠﺒﺪ ﻫﺎﺩ ﺍﻟﺸﺎﻗﻮﺭ ﻣﻦ ﻭﺟﻪ
ﻣﺮﺍﺗﻚ ﺅ ﺗﻘﻄﻊ ﺑﻴﻪ ﺭﺍﺱ ﻭﻟﺪﻙ ﺅ ﺗﻤﺸﻲ ﺻﺤﻴﺢ ﻣﺎﺑﻴﻚ ﻭﺍﻟﻮ . ﻳﺎ ﺇﻣﺎ ﺗﺤﺎﻓﺾ
ﻋﻠﻰ ﺭﻭﺡ ﻭﻟﺪﻙ ﺅ ﻧﺤﻴﺪ ﻟﻴﻚ ﺃﻋﺰ ﻣﺎ ﻋﻨﺪﻙ ﻟﻲ ﻫﻮ ﺍﻟﺒﺼﺮ ﺗﺎﻋﻚ .
ﻗﻠﺖ ﻟﻴﻪ ﺅ ﺑﻼ ﺗﻔﻜﻴﺮ ﺑﺎﻏﻲ ﻭﻟﺪﻱ ﺅ ﺧﻮﺩ ﺍﻟﺒﺼﺮ .
ﻗﺎﻝ ﻟﻴﺎ ﻟﻲ ﺑﻐﻴﺘﻲ .
ﺷﻮﻳﺎ ﺑﺎﻥ ﺿﻮﺀ ﺳﺎﺍﺍﺍﺍﺍﺍﺍﻃﻊ ﺑﺰﺍﺍﺍﻑ ﻣﺎﻋﻤﺮﻱ ﺷﻔﺖ ﺑﺤﺎﻟﻮ ﻣﻦ ﺑﻌﺪ ﻣﻨﻮ ﺗﺒﻌﻮ
ﻇﻼﻡ ﺅ ﺳﻜﺎﺕ ﻣﻦ ﺗﻢ ﻋﺮﻓﺖ ﺑﻠﻲ ﻋﻤﻴﺖ ﺅ ﻣﺎﺑﻘﻴﺘﺶ ﻧﺸﻮﻑ . ﻣﻦ ﺑﻌﺪ
ﺷﻮﻳﺎ ﺗﺎﻉ ﺳﻜﺎﺕ ﻭﻗﻔﺖ ﺅ ﻗﻠﺖ ﻋﻤﺮ ﻋﻤﺎﺍﺍﺭ ﻋﻤﺎﺍﺍﺭ ﺣﺘﻰ ﻧﺴﻤﻊ ﺻﻮﺕ
ﺇﻳﻘﻮﻝ ﻟﻴﺎ . ﺣﺒﻲ ﻣﺎﻟﻚ ﺣﺒﻲ ﻣﺎﺍﺍﻟﻚ ﺑﺴﻢ ﺍﻟﻠﻪ ﻋﻠﻴﻚ . ﺣﺴﻴﺖ ﺑﺤﺎﻝ ﺻﻮﺕ
ﺃﻣﻴﻨﺔ ﺅ ﻗﻠﺖ ﻟﻴﻬﺎ ﺷﻜﻮﻥ ﻧﺘﻲ !!
ﻗﺎﻟﺖ ﻟﻴﺎ ﺣﻴﺎﺗﻲ ﺃﻧﺎ ﻣﺮﺍﺗﻚ . ﻋﻨﻘﺘﻬﺎ ﺅ ﻗﻠﺖ ﻟﻴﻬﺎ ﺑﺎﻗﻴﺎ ﺣﻴﺎ
ﻗﺎﻟﺖ ﻟﻴﺎ ﺭﺍﻙ ﻛﻨﺘﻲ ﻛﺎﺗﺤﻠﻢ ﺑﺴﻢ ﺍﻟﻠﻪ ﻋﻠﻴﻚ .
ﻗﻠﺖ ﻟﻴﻬﺎ ﻓﻴﻦ ﺍﻟﺒﻨﺎﺕ ﻗﺎﻟﺖ ﻟﻴﺎ ﺭﺍﻫﻢ ﻓﺒﻴﺘﻬﻢ ﻧﺎﻋﺴﺎﺕ ﺭﺍﻩ 4:30 ﻫﺎﺩﻱ
ﺗﺎﻉ ﺻﺒﺎﺡ . ﻗﻠﺖ ﻟﻴﻬﺎ ﻓﻴﻘﻴﻬﻢ ﺅ ﺟﻴﺒﻴﻬﻢ ﺩﺍﺑﺎﺍﺍ ﻋﺎﻓﺎﻙ ﺟﻴﺒﻴﻬﻢ ﺅ ﺟﻴﺒﻲ ﻋﻤﺮ .
ﻣﺸﺎﺕ ﺟﺎﺑﺘﻬﻢ ﺅ ﻗﻠﺖ ﻟﻴﻬﻢ ﻭﻟﻴﺪﺍﺗﻲ ﻗﺮﺑﻮ ﻟﻴﺎ ﻧﺸﻢ ﺭﻳﺤﺘﻜﻢ ﻗﺮﺑﻮ ﺭﺍﻩ
ﻣﺎﺑﻘﻴﺘﺶ ﻧﺸﻮﻑ .
ﻓﺎﺵ ﻗﻠﺖ ﻟﻴﻬﻢ ﻣﺎﺑﻘﻴﺘﺶ ﻧﺸﻮﻑ ﺗﺼﺪﻣﻮ ﺅ ﻗﺎﻟﻮ ﻣﺎﻳﻤﻜﻨﺶ ﻣﺴﺘﺤﻴﻞ ..
ﺍﻟﻤﻬﻢ ﻣﻠﻲ ﻋﺮﻓﻮ ﺑﻠﻲ ﻣﺎﺑﻘﻴﺘﺶ ﻧﺸﻮﻑ ﻋﻨﻘﻮﻧﻲ ﺅ ﻛﺎﻳﺒﻜﻮ ﺅ ﻓﺼﺒﺎﺡ ﻗﺮﺭﺕ
ﺑﺎﺵ ﻣﺎﻧﺰﻳﺪ ﺍﻟﻠﻴﻠﺔ ﺗﻤﺎ ﻫﺰﻳﻨﺎ ﺭﺣﻴﻠﻨﺎ ﺅ ﺗﺤﻮﻟﻨﺎ ﻟﺪﺍﺭ ﺑﻴﻀﺎ ﺅ ﻋﺸﻨﺎ ﺗﻤﺎ ﺩﺍﺑﺎ
ﻭﻟﺪﻱ ﻋﻤﺮ ﺧﺪﺍﻡ ﻓﺎﻹﻳﻤﺎﺭﺍﺕ ﺑﻮﻻﺩﻭ ﺗﻤﺎ ﺅ ﺑﻨﺎﺗﻲ ﺗﺰﻭﺟﻮ ﺅ ﺑﻘﻴﺖ ﺃﻧﺎ ﺅ
ﺃﻣﻴﻨﺔ ﻓﻮﺍﺣﺪ ﺩﺍﺭ ﻓﻜﺎﺯﺍ ﺑﻨﻴﺘﻬﺎ ﺑﺈﻳﺪﻱ ﺅ ﻫﺎﺩﻱ ﻫﻲ ﺍﻟﻘﺼﺔ ﺗﺎﻋﻲ ﺁ ﻭﻟﺪﻱ
ﺍﻟﻨﻴﻨﻮ .
ﻗﻠﺖ ﻟﻴﻪ ﻋﻤﻲ ﻫﺎﺩﺷﻲ ﺻﻌﻴﺐ ﺇﺗﻘﺒﻠﻮ ﺍﻟﻌﻘﻞ ﻭﻟﻜﻦ ﺑﺎﻳﻦ ﻋﻠﻴﻚ ﺇﻧﺴﺎﻥ
ﺻﺎﺩﻕ . ﻗﺎﻝ ﻟﻴﺎ ﺷﻜﺮﺍ ﺅ ﺩﺍﺑﺎ ﺭﺍﻩ ﻏﺎﻧﻤﺸﻲ ﻋﻨﺪﻱ ﺍﻟﻜﺎﺭ ﻟﻜﺎﺯﺍ ﻣﻊ .7 ﻗﻠﺖ
ﻟﻴﻪ ﺑﺴﻼﻣﺎ ﺁ ﻋﻤﻲ ﺩﻳﺘﻮ ﺭﻛﺒﺘﻮ ﻓﻄﺎﻛﺴﻲ ﺅ ﻗﻠﺖ ﻟﻤﻮﻝ ﺍﻟﻄﺎﻛﺴﻲ ﺇﻭﺻﻠﻮ
ﻟﻠﻤﺤﻄﺔ ﺗﺎﻉ ﺍﻟﻜﻴﺮﺍﻥ ﻟﻲ ﻓﺎﻟﻤﺴﻴﺮﺓ ﺃﻛﺎﺩﻳﺮ ﺅ ﺃﻧﺎ ﻏﺎﺩﻱ ﻟﺪﺍﺭ ﺅ ﻛﺎﻧﻔﻜﺮ ﻣﻦ
ﺑﻌﺪ ﻗﻠﺖ ﻏﻴﺮ ﻣﺴﻄﻲ ﻫﺬﺍ ﺅ ﻛﺎﻳﻘﻠﺐ ﻟﻲ ﺳﻄﻲ ﻣﻌﺎﻩ .
ﺩﺍﺯ ﺃﺳﺒﻮﻉ ﻧﺴﻴﺖ ﺩﺍﻛﺸﻲ ﻟﻲ ﻗﺎﻝ ﻟﻴﺎ ﺩﺍﻙ ﺍﻟﻌﻢ .
ﻭﻟﻜﻦ ﻣﻦ ﺑﻌﺪ 5 ﺷﻬﺮ ﺅ ﺃﻧﺎ ﺧﺎﺭﺝ ﻣﻦ ﺩﺍﺭ ﺗﺎﻋﻨﺎ . ﺧﺪﻣﺖ ﺍﻟﺮﺍﺩﻳﻮ ﻓﺘﻴﻠﻴﻔﻮﻥ
ﺅ ﻏﺎﺩﻱ ﺷﺎﺩ ﺑﻴﻪ ﺳﺘﻮﻥ ﺣﺘﻰ ﺑﺪﺍﺕ ﺍﻟﺨﺒﺎﺭ .
ﺅ ﺗﻔﺎﺟﺄﺓ ﺑﺎﻟﺨﺒﺮ ﻟﻲ ﻛﺎﻳﻘﻮﻝ " ﻭﻓﻲ ﻣﺤﺎﻭﻟﺔ ﺗﻬﺪﻳﻢ ﻣﻨﺰﻝ ﻗﺪﻳﻢ ﺑﺄﺣﺪ
ﻣﻨﺎﻃﻖ ﻭﻻﺩ ﺑﺮﺣﻴﻞ ﻭ ﻫﻮ ﺍﻟﻤﻨﺰﻝ ﻋﻴﻨﻪ ﺍﻟﻠﺬﻱ ﺷﻬﺪ ﻣﺠﺰﺭﺓ ﻋﺎﺋﻠﺔ ﺧﻼﻝ
ﻣﻨﺘﺼﻒ ﺍﻟﻘﺮﻥ 20 ﻭﺟﺪ ﻋﻤﺎﻝ ﺍﻟﺘﻬﺪﻳﻢ ﻋﻀﺎﻡ ﺑﺸﺮﻳﺔ ﻣﺪﻓﻮﻧﺔ ﻭﺳﻂ ﺍﻟﺤﺎﺋﻂ
ﻭ ﻗﺮﺑﻬﺎ ﺻﻨﺪﻭﻕ ﺫﻫﺐ ﺗﻘﺪﺭ ﻗﻴﻤﺘﻪ ﺏ ﻣﺌﺔ ﻣﻠﻴﺎﺭ ﺳﻨﺘﻴﻢ ﻭ ﻻ ﺗﺰﺍﻝ
ﺍﻟﺘﺤﻘﻴﻘﺎﺕ ﺟﺎﺭﻳﺔ ﻓﻲ ﺍﻟﻘﻀﻴﺔ ....."
ﺗﺼﺪﻣﺖ ﺅ ﻣﻦ ﺑﻌﺪ ﺿﺤﻜﺖ ﺅ ﻗﻠﺖ ﻣﻊ ﺭﺍﺳﻲ ﺑﻠﻲ ﺗﺴﺮﻋﺖ ﻓﺎﻟﺤﻜﻢ ﻋﻠﻴﻪ
ﺑﺎﻟﻜﺬﺏ ..
لا يوجد تعليقات
أضف تعليق