قصة منال

منال بنت غزالة .وبنت مخلقة ومربية لكن همها الوحيد هو تلقى روميو زعما مسكينة قالت لك بغات الراجل كانت متاترة بزاف بالافلام الهندية بما فيها افلام الحب والرومانسية ...حتى هي بغات تسمع كلام الغزل والحب وبغات تتعنق وتباس ...وتحل عينها كل صباح تلقى راسها ناعسة بين دراع راجلها وحبيبها ...احلامها كانت كلها في نطاق المعقول والحلال بغات غي المعقول ودير حتى هي وليدات ودويرة مملكة ديالها تكون هيا الملكة فيه ...الزغبية قررت مع راسها تبدا تقلب على روميو ما فيها ما تسنى حتى يجيوها الخطاب لباب الدار او حتى تشوفها اخت شي واحد فالعرس او شي شيبانية تحك لها في الحمام .ودق دارهم تخطبها لولدها ...بغات تعيش الحب قبل ما دخل القفص .شافت كاع صحاباتها مصاحبين وعندهوم بورطابلات كيظلو يهضرو ويتميساجاو ...حتى هي بغات تعيش الحياة ...كانت خدامة فواحد الروض كتقري البعالك .مقابلة بو خنونة وخا هكذاك عزاز عليها ...بعد ما خرجت من القراية عندها مستوى الباك وما بغاتش تكمل ...ملي خدمات اول تخليصة ليها لي مكتعداشي االف درهم مشات شرات بورطابل هههه عفريتة بلا خبار باها وخوتها لي كانو قاصحين معاها وهما سبابها حتى خرجوها من القراية .حتى كلست منها ...ما خصها حتى خير باها كان خدام فهولاندا ودخل للمغرب ودخل معاه اللعاقة وخا هكذاك راجل سقرام جلدة هههه فلوس الحمام مكيعطيهم لها غي بالبكا والطليب والرغيب ...ما داهومش لهولاندا ملي كان خدام فيها ...خلاهم مع دار جدها وجداتها وعمتها رقوش زعما رقية لي دوزاتها على ماماها .ملي كانو معاهم حيت هي متزوجاتش كاع ...يكمن حيت واعرة بزاف وشاطا ماطا ...كان كيشوفهم غي مرة فعام او عامين او ثلاثة كاع .داك الشي علاش ما رباتش عليه الكبدة .حيت راجل قاصح وسقرام ...اصلهم شلوح من امينتانوت .تما فين تزادت منال وكبرت ...حتى دخل باها من هولاندا وداهم للدار لي بناو في كازا تما عاد بداو يعيشوا شوي ...وخا حارمهم من بزاف د الحوايج موفر لهم الاكل ما لذ وطاب والدار غزالة اشمن فراش وزليج ورخامات وديكورات غي داك الشي الواعر ...منال متطلباتها كثيرة كاي بنت .خصها الماكياج ومصروف د الكوافورة والتعبئة والحوايج على ذوقها و ديك 200 درهم لي كيعطيها الحاج محماد زعما باها غتكفيها ...باختصار البنت عينيها زاغو ورجليها بغاو يخرجو الشواري هههه ...بز من دا محماد ههه. اوا اجيو نشوفو قصة د هاد الفرفارة ديال منال .

منال غزالة بحال كاع الامازيغيات خاصة بنات امينتانوت الزين الحر الصافي .بيضة ووجهها مدور وعويناتها مجبدين وكبار ورموشها كبار والحجبان مطراسيين ومقادين من عند الخالق .ولاطاي يا سلام على لاطاي عامرة ومطيبزة وليهونش اكثر حاجة كتجذب فيها والكريشة داخلة ...المهم مثيرة بزاف خصها غي تكون لباسة وتهلا فراسها مزيان غيطيرو بيها ...ملي جات من امينتانوت كان فعمرها 15 سنة ..كانت كتلبس غي الصايات والفولار حوياج مستورة ومحترمة .شوي حيدات الفولار بز من باها وكلاتها عليه ههه ياما تصرفقت وتبونات عليه .لكن الجنية راسها قاصح .شافت البات فكازا قريناتها عطينها غي للمزير والدجين والفيزيون ههه زعما الكولونات شوي غيبقاو يتمشاو عريانات ...الشعورات مطلوقين ومصبوغين والمكياجات وخا غ بعلوكات ديال 15 سنة ...حتى هي مكرهت دير بحالهم كون مكتخاف من الحسن والحسين خوتها لي اكبر منها .هادو ميحنوش فيها ما كاين غي دكدك فرشخ .وديما كيصرو على الوليد يحبسها من المدرسة ...البنت بدات تزيان وتكبار وجايبة واحد الطول والعمارة تقول غي كيم كردشتان ههه .الحسين كاع اصعب من الاخر لي حلف يا هي ياهو غي تكلس من القراية في الوقت الي هو كيقرا في المدرسة د المهندسين لي في المحمدية .هو لي طلع القراي رقم واحد لكن بغا يحرم غيرو من القراية .وخا السيد واعي وقاري وغيكون مهندس قد الدنيا ...وحتى هي لالهم الغزالة ما عندها سوق في القراية ما ردتهاش في وجههم وكلسات قبل ما يقرر باها ههه...والحسن كان كيقرا في كلية د الحقوق وخا هكذاك ما عارف لا حقوق لا برقوق .وعيشة وخديجة تزوجو حيت هما الكبارات ...زربو عليهم وزوجوهم على 14 و15 .بقات لهم غي هاد دعاوي البلا لي هي الصغيرة فايهم كاملين ...الحاج محماد ملي دخل لبلادو دار جوج هرييات ديال المواد الغذائية .وكيحسب للريال الف حساب .حتى من الحوايج داير بناقص عندو جوج فوقيات وجوج طاكيات وجلابية كيتخشا فيها ديما فوقت البرد ...اما لالة اجى لي هي الام عندها مسكينة جلابة واحدة باش كتخرج وعباية ماعرت كيطرا وجابها لها الحاج من السعودية ملي حج ...المهم عائلة علااام كلست من المدرسة فوسط السنة د الباكالوريا .دابا فعمرها 19 سنة بستو وستين كشفة باش خلاوها تخدم فواحد الروض ديال واحد السيدة منقبة ساكنة في الشارع لي وراهم .كانت دايراه تحت دارها فواحد الجوج كراجات عندها .مجهزاه ومقداه وخدمات معاها منال مقابلاه ليها وكتقري البعالك لي كيسطيو ...باها عجباتو الفكرة واخا المفاليس د الحسن والحسين حلفو ما تمشي وخا هكداك الكلمة ديال دا محماد وملي سمع فيها خلصة واخا قليلة وافق بلا ما يتردد قالهم - اش غتبقى دير لي هنا مو افادن تكون هلي ارتستا اغروم زعما بالعربية اش غتبقى دايرة لي هنا مو الركابي غي ناعسة وكاتاكل الخبز تمشي واخا تجيب غي فلوس الحمام والشبان ديالها ههه ...وخا الخلصة قليلة ما يهمش هو يموت على الريال ...وديما كتسمع القولة الشهيرة ديالو هاتي الفلوس شقان اتن تاويت .زعما راه الفلوس واعرين تجيبهم .قبلات منال بالخدمة طول النهار صباح وعشية بمبلغ قليل المهم غي تبعد من الدار قنطات ودرها راسها من الغوات ديال باها الي مكرهشي يزوجها من غدا وخا غي من سارح غي يتهنى منها ...عندو فكرة بلي البنات صعاب وقد ما زوجهم بكري يتهنى من مصروفهم وصداعهم لدرجة انو زوج بناتو بلا ما يحضر لهم عرسهم او يشوف ناسهم لكن الله ختار لهم الازواج الصالحين ومهلين فيهم واخا غي على قد الحال اكثر من دار باهم لي خانز فلوس ...منال مكرهتش كون تزوج حتى هي تهنى من -افقير ن الهم- زعما الشيباني د الهم كي كتقول عليه فخاطرها هي وامها ههه.لكن هي مبغاتش اي واحد لابد يكون زين وطول وفلوس كتموت على الفلوس الي كتشوف بلي هما مفتاح السعادة واخيرا الحسين تهنات منو تخرج وخدم ومشا للرباط ولا مستقر تما نساهم كاع قليل فاش كيزورهوم وكيصفط للوليد شي بركة ...مخصو خير وطامع فخلصة ولدو ...والحسن غيديرو ليه العرس هاد الصيف خطب واحد الشليحة من امنتانوت بنت واحد الحاج صاحب باه غزالة وخا هو كان مصاحب ست سنين مع واحد البنت سميتها بشرى مسكينة ضيعت سنين معاه غي خدم وبغا يتزوج مشا جابها من بلادهم والوليد لي ختار ليه ...وخا هكداك مقصرش من جيهتو طلب منهم يخطبوها ليه لكن رفض دا محماد قال ليه والله لا دخلت داري وتديها نسخط عليك .- ختان اورايكشم تكمينو اجلوف - الحسن ما دارش فيها شاروخان وتشبت بالحب ديالو قال مرا مرا ماكتابش سمح في الحبيبة وتزوج ب نزهة حتى هي زوينة وزين سوسي يا سلام .لكن هي مفششة مبعككة باها مهلي فيهم بالجهد عكسهم هما قارية اللغات وعندها اجازة في الادب الفرنسي لكن مبغاتش تخدم حيت ما محتجاش كي كتقول ...ملي تزوجت اللحسن كان عاد التحق باالخدمة ديالو دركي ما كانتش عاجباه هاد الخدمة دارها غي باش يهز راسو حيت الوليد ديالو حلف لا عطاه الريال ومبغاش يساعدو يدر المهنة لي كيعشق .مهنة د المحاماة .الوليد اصر تعيش مرات اللحسن معاهم لقاها سبة باش يبقى يصيفط لهم الفلوس وياكلو المصروف مع مراتو ...اللحسن كان بغا يكون هذا غي حل مؤقت بينما انتقل من واحد القفار ف فكيك حيت تاني موقفش معاه باه باش يشري بلاصة تكون شوي صالحة للعيش . وحتى نزهة معجبهاش داك الخلا الي خدام فيه وفضلت تصبر شوي حتى يقدر يخرج من تما وتلتحق بيه ...وملي جا الوقت المناسب حلف الحاج محماد ما تمشي فين .تما فين كعا عليهم وتخاصم معاهم وحتى نزهة ما قداتش على القهرة د شيخها ونكيرو واعر بزاف ...كان راجلها كيمشي يشوفها من كونجي لكونجي .تبهدل حتى ندم كاع علاش جبد شي موضوع د الزواج معاهم وعلاش كاع تزوج نزهة خاصة ملي جرا عليه الوليد وقال ليه ما انت ولدي ما انا باك ندم وقال كون عرفت هكدا غيطرا كون ديت غي البنت لي كنت باغي ساخط علي ساخط ...هنا منال فرحات ما بقا حكام وحتى الحسين تقهر من صيفط صيفط وما بقا كاع كيجي قليل فين كيتصل بالوليدة داك الوقت منال فعمرها 20 سنة تهنات بعدا من دوك الجوج كوارت لي واخا كانو بعاد منكدين عليها . .. كانت دايرة بورطابل من وراهم وديما فيه السيلونس خاصة ملي كيكونو الشحوط فالدار ...شحال من قصة غرامية عاشتها عبر الهاتف ههه وشحال من قندوح واعدها يجي يخطب ويسيفط مو والو ملي خدمت فالروض لدابا 20 سنة يعني عام التليفون ما جاب فايدة .وكل واحد كيصر تلاقاه ويتشاوفو ويخرجو حتى هما ويديروا يد في يد ويتمشاو حدا البحر ما كتوافقش .كيمشي ويخليها ويقول عليها معقدة كيبقى فيها الحال وتبكي بكا د الفقسة مسكينة دغيا كتربي الكبدة .هاد العام تعرفت على فوزية 23 سنة موجزة في الادب العربي مسكينة ما لقات خدمة فرحات منال وبرد قلبها من جيهة القراية وقالت لها لاباس ملي ما عذبت راسي وكملت .روض روض ههه تشوميرة تشوميرة ...فوزية كانت بنت سمرة ومحتجبة وكطير شاعلة فيها العافية بهاد المعنى .لي شافها ما يظنش كدير الفعايل لي ما ديرهومش مولات الفيزيون -الكلون- ههه...نساجمات هي ومنال ولاو صحابات الروح بالروح حتى من دا حماد ما رفضش تجي عندها للدار وخا ما كيبغيش البنات يجيو عندها وتصاحب معاهم خاصة منهم المتبرجات والمعرريات ....فوزية كتبان معقولة كتلبس حويج مستورين والسال زعما محجبة ومكديرش المكياج غي شي حاجة خفيفة كتعيش فدرب قريب لمنال هذا لي خلاهم يوليو انتيمات ...تعارفو على بعضهم بز ف ولاو يهضرو فكلشي ويتعاودو اسرارهم ورغباتهم لدرجة ابسط حاجة ممكن يتخيلوها ولو حلمة خصهما يتعاودوها ...فوزية سخونة بالمعنى الجنسي وكتشفاتها منال من تليفونها لي ظنات غتلقى فيه القران والاناشيد الدينية .كانت كتستغرب لها علاش دايرة ليه مو دوباس .كلمة السر. البنت عندها فيه العجب فيديوهات ديال البورنو وتصاور د العرا والكواريت هههه...منال بدات تكتاشف اشياء كثيرة على العلاقة بين الرجل والمر من داك الشي لي كتعاود لها فوزية وكتوريه ليها في الفيديوهات ديال المسخ ...دا حماد كان ديما كيقول لبنتو اوا هاد البنت باينة بنت الناس رتاحت من جهتها معرفت علاش دخلت خاطري هههه الله يهديك ادا حماد فوزية كتجي عند منال بزاف للدار والحاج كيقولها غي بنتي فوزية وحتى لالة اجي مسكينة ملي كتجي كتوجد لهم اتاي والكيكس هههه...واحد النهار صرت فوزية على منال باش دير لها فايسبوك ...-كيفاش اصحبتي انت معندك فايس باقا شي بنت دابا معندهاش فايس ومكتعرفش دخل ليه والله الا راكي دمدومة وكضيعي شبابك عيشي لافي عيشي الحياة - منال معترضاتش خصها غي تعلمها وتوريها كيف دير .ودارت لها باج ودارت فيها تصويرة ديال بنت غزالةباش تجيب لها الاصدقاء ...منال عجبها الحال وكاع ملي قالت لها بلي شحال من بنت تزوجت من الفايس بوك وطاحت فيهم غي هما الملعقين والسواعدة وصحاب الهاي كلاص .البنية طمعت وتعلمت كيفاش تتراسل في الفايس وتاجوتي الدعوات وكلشي ...فوزية مدمنة على الفايس بوك النهار ومطال وهي حالاه حتى في الخدمة .وحتى بوراس لي كتهضر معاه تعرفات عليه من الفايسبوك ...عاودات لها عليه هو عسيكري في مكناس لكن هو ولد كازا وكتخرج معاه مرة رمة ملي كيجي ...دوزات معاه الكوارت كان تيديها لواحد البيت كاريه شي صاحبو في المحمدية وتما كتعيش الحب كيف قالت .عاودات لها كاع التفاصيل كيفاش كيعريها ويبوسها .المهم كيخوي فيها كاع الكبت ديالو .منال بقات حالة فمها ومبهوطة وجارا حناكها بظفارها وعينيها مخرجاهم -اناري يا المسخوطة ضيعتي شرفك - ضحكات فوزية حتى خرجو دموعها وقالت لها يا الهبيلة راه داك الشي عادي وراه مكيقيسش لي شرفي منال -ايلي يا الزغبية ما خفتيش يتقبك - ضحكت فوزية حتى طاحت الارض .وقالت - والهبيلة حنا راه كبار وبعقلنا وهو مواعدني ميقيس لي شرفي وحنا راه غندزوجو يعني بحال راجلي وهاد الشي باش نديو على بعضنا ...منال معجبهاش هاد الشي قالت لها عندك يضحك عليك خاصة ملي وراتها صورتو كان بوكوص وابيض وطويل زين عليها بالف درجة وقالت فراسها هذا باين غي كيضحك عليها شو هي كيدايرة سمرة ومسندرة وريحة عرقها كتكلب ...فوزية مكتحشمش تعاود لها ونهار بعد نهار اكتشفت بلي هاداك العسيكري ماشي الاول والوحيد لي دارت معاه فوزية هكداك . .. منال حتى هي بدات تزعم ولات تدخل لصفحات +18
ما كانت كتعرف شنو هو الجنس .وخا عارفة بلي كتكون شي حاجة باش تولد المرا .ولات كتبرر لراسها باش تفرج ف الفيديوهات ديال الفاحشة - ومالي انا راه كبرت وقربية نتزوج خصني نعرف هاد الشي ...والراجل الى ما عرفت لوالو غيخوني وميبغينيش ...كتفرج وكتحس باشياء في جسدها بلي هي ما كرهتش داك الشي .كانت كتجيها الرغبة بحال كاع الناس وداك الشي فطرة فينا وطبيعة لكن مع الحكايات ديال فوزية ودوك الفيديوهات ولات كتحس ديك الرغبة كتشعل بزاف.اندمجت مع الفايسبوك ولقاتو عالم زين نسات راسها فيه .ولات كل اسبوع كتعبأ التليفون على ود الفقايس بوق .تعرفات على واحد الدري من تازة فعمرو 26 عجبها بزاف بداها بالظرافات والهضرة الحلوة .وراها تصاورو كان زعر وطويل وخا ما كيعجبوهاش الرجال الشهبين تزعطت فيه .اول هضرة بينهم بدا كيقول لها حبيبة عمري كبيدة .طلبها توريه التصاور لكنها رفضات وبقا ملح حتى قبلات وراتو وحدا غي بالوجه اصر توريه اخرى تكون كلها باينة .وراتو الاخرى وهكذاك حتى بقات كتوريه فتصاورها كولهم الاغلبية صيفطاتهم ليه .واخا كيتنادم معاها الحال حيت عمرها دارتها وشحال من واعد طلبها ورغبها وما صيفطاتهم لحد .حتى خرج لها الزعر من الجنب ههه عجباتها حلاوة هضرتو وبقا كيحكي لها عليه وحكى لها على صاحبتو لي كانت كتمشي عندو لتازة وكتبات معاه فدارو الي كاري .حيت هو خدام استاذ الاعدادي ودارهم فتاونات ...قالها بلي كانو غيتزوجو كون ما زوجها باها لواحد الزماكري في اسبانيا جاتها منها الغيرة ...وتعجبات من الي ولاو البنات كيديروه وهي فدار غفلون حتى من فوزية وجه الفاخرة شعكوكة الجيكسة دايرة العجب ومازال كيتزوجو وكنبقى انا الي بنت دارنا وبنت الحكام ...علي بدا كيغريعها ويعاود لها على مغامراتو مع البنات وكلهم نعسو معاه كي قال لها بقات ليه غي هي ههعهه ...قال لها انت بنت الناس وبغيتك مراتي وحلالي ونديرك فداري ام اولادي لدرجة انو كيقولها غي مراتي الحبيبة وكيلح عليها تبقى تقول ليه راجلي العزيز ...المهم تزوجو بقات لهم الدخلة وما زكلهاش كي تزوجو بالهضرة دارو الجماع بالهضرة والكتبة ...بقا كيغري فيها حتى لقات راسها كتهضر معاه في الجنس ...ملي غنتزوجو غندير لك وندير لك وانت احبيبة ...من الكتابة ولاو كيهضرو عادي فالجنس فالتلفون كانت كتحس بانوتتها وتيعجبها الحال غي كيقطع كتندم وتحلف حتى متعاود .وخا تفارق معاه ...لكن الامور عاد غتبدا في الصح

المهم اخلاق منال بدات كتسوء الفايس بوك وفوزية دارو الازم وعلي كمل الباهية ...علي خدا كونجي وصمم يمشي يشوف مراتو وام ولادو لي دارهم في ليلي الحميمية عبر الهاتف .ودا محماد ناعس كيشخر هههه .كان ديما كيقول لمراتو لالة اجي بلي منال ولات دارت عقلها وترزنت ملي تعارفت على فوزية وقالها كون يجي الحسين ندي ليه هاد البنت وخا -تاسوقيت - ههه لالة اجى قالت ليه مالي طايحة على زنافري ندي لوجهي ديك العزية ولدي مهندس الزين والطول .مساكن كيهضرو وهما ما عارفينش بلي الحسين تزوج وتزوج بواحد البنت تلاقاها فبوات دونوي زعمى ملهى ليلي صيداتو الصلقوطة .ما قالهاش لدارهم ولا لحتى احد هاكاوا على مول الشرف والحكام دا مرا داز عليها لي ما يسوا ولي ميسواش لكن بيني وبينكم دار خير خرجها من الفاحشة والبنت قرطاسة وتستاهل وبنت عائلة وخا هكداك باها قبطان في البحرية .وهي عايشة حياتها بوحدها في الحرية كتخدم فواحد البنك فالرباط .الحسين تزعط فيها وبقات كتعاشرو غي هو وبزوجهم تبلاو بالشراب .لكن لقى فيها الحنان لي ما لقاه فدارهم وحتى هي لقات فيه الحنان لي ما لقاتو ف باها لي كان ديما بعيد عليهم .لالة اجى ظريفة لكن مكتعرفش شنو هو الحنان او تعبر عليه من داك النوع الحشومي غي ساكتة كتعرف غي تاكل وتنعس مادياها في احد حتى بنتها كاع ما كتجمع معاها ما تنصحها ما ترشدها ما توجهها ما خلاتش لها رقوش شي جهد هههه شحال تناتفو وتناكرو وتعايرو رقوش مازال مع امها في امينتانوت وكيما هي شوطة مسخوطة ما دا منها الزمان والو نهار كتعرف منال ومها بلي غتجي عندهم كيجمد لهم الما في الركابي ...نرجعو لهاد المسخوط دعلي لي مصر يشوف منال البنت حتى هي تزعطات فيه ولات غي كتهتهت بيه علي علي هز علي حط علي ...فوزية كتشجعها تلاقاه ومستعدة تعاونها كاع بغات تفسد لها اخلاقها والسلام ...اخيرا لقاو خطة باش تخرج منال ودا احماد وافق وخا لالة اجى ما بغاتش .قالو ليه بلي خصهم يدفعو فواحد المدرسة غيخلصوهم مزيان الحاج حيت القضية فيها الفلوس ومع فوزية هانياتون ...سيرو ترزقو الله يرضي عليكم هههه ...احيانة عليك اد محماد ما جايب خبار هههه عرضهم لحدا لاكوط د عين الدياب مشاو حتى لدار فوزية وتزوقو وتقادو .منال لبست صاية فالكحل فايتة الركابي شوية وبودي فالموف وطلقات الشعار ولبست صباط موف واو جات كتفتن ودارت مكياج خفيف .زعمت الفرفارة بغات تغوي علي . مراهنة بلي غتديه فوزية وخا تقاداتحتى عيات فين تبان لمنال شمن سيقان تقول غا قوالب سكار والفخاض باينين مصورينمن الصاية حيت كانت مزيرة . ركبو الطوبيس لي غيديهوم من سباتة لعين الدياب كاينة نيت الطريق لكن مزيان البعد.. وصلو بعد ساعة لقاو علي هو وصاحبو كيتسناوهم حدا الكورنيش د عين الدياب ...بقا مجموعين حتى فطرو من بعد كل جوج وفين زادو ...منال غيسكت لها القلب اول مرة تخرج مع راجل ...بقاو كيتمشاو حدا البحر وشوي بشوي كيزعم شد يديها شبكها في ايديه وبقاو غاديين ... بحال داك الشي الي كانت تتشوف فالافلام الهندية كمال كيحكي على كلشي الا الزواج مهدرشي فيه .وقد ما كيدوز الوقت كيزعم هي مكتهضرش بزاف مازال حشمانة ومخلوعة شوي دار يديو عليها شوي عنقها ودفعاتو بقاو غاديين وكيشوف فيها كانت مثيرة بزاف هيجاتو وهو يجرها عندو من جنابها حتى لصقها معاه قالها مالك خايفة انت حبيبة ديالي قالت ليه طلقني قالها والله ما نطلقك حتى تبوسيني .وخا بينت بلي راها معصبة عجبها الحال وحسات الدفئ ديال جسمو وتحركات فيها شي سخونية .بقات كتشوف فيه .قالها اوك انا غنبوسك ملي ما بغيتيش انت .وبقا كيبوس فيها بشراهة ما بغاش يطلقها وحتى هي ما سخات ...العفريتة دارتها فينك يا الحسن والحسين اجيو تشوفو سلعتكم هههه .فوزية دغيا زعمات مع الاخر العافية ما خلا فين قاصها بقا لهم غي احيدو الحوايج عند بالها الزغبية هاد الشي الي غيخلي الراجل يزعط فيها ...رجعو تجمعو باش يتغذاو ومنال بقات غي حادرة راسها ملي جرا وقلبها كيضرب ...ها لاش جراتها فوزية ..تغداو ورجعو تفرقو تاني ومنال الصكعة عجبها البوسان والعناق وجبد يا مات جبد .كان علي اول واحد يقيسها باسم الحب. تبا لهاد الحب الي يبهدل البنات هكذا

شافت بلي كاع ليكوبل لي تم دارو بحالهم واكثر داك الشي باش زادت زعمات ...والبوليس زعما كيدورو ههه البلاصة كانت شبه خالية .واشمن جرائم تيوقعو حدا البحر ...وصلات الخمسة د العشية وعلي ما هضرش لا في زواج ولا خطبة صممت هي تجبد الموضوع وخا جاها الامر صعيبة ...كتشوف بلي اهانة ليها هي لي تبادر تجبد الموضوع وماعارفاشي بلي اكبر اهانة هي لي دارت فراسها مع سلقوط بحال علي ...قالت ليه اوا شنو درنا فموضوعنا قال - ولا عليك انا ملي غنمشي لتاونات غهضر مع دارنا وغنجيو عندكم - العويهة صدقات وجرها عندو كمل اعمال التخريب والنبش لي كان تيدير ...مشاو البنات فحالهم الستة لقاتهم في الدار .ديك الساع مازال ماجا دا احماد والام د منال ما عندها سوق ماسولت اش دارت ولا مادارت ...ضربتها بتدويشة وهي فرحانة بلي غتخطب قريب مسكينة كتحلم ...صاحب علي تمتع مزيان بفوزية حيت معترفة اما علي وخا هكذاك قهراتو غي بالقريص ومرة مرة كدفعو .علي قال لصاحبو البنت عجباتو بزاف وبغى ينعس معاها -هبلاتني اصاحبي ديك الصاطا ...كون غي تبغي تجي لي غدا نبرد غي هاد العافية لي شعلات في - صاحبو قال ليه بلي البنت زينة وباين عليها بنت الناس وماديال داك الشي علي ضحك حتى بانت ليه ضرسة د العقل قال ليه - والله الا راك دمدومة شتي البنات راهوم مصيبة يلعبو بيك ويحسنو ليك بلا ما تلقاها شابعا... وجايا ديرهم علي شوف غي اللور ديالها قداش ...مسكينة ظلمها وبزاف لكن تستاهل هذا هو الراجل لي غيديرها حلالو ...صاحب علي قال ليه بلي فوزية قالت ليه بلي غيطلبها للزواج وهو يضحك حتى بانت السوسة ديال ضراسو وقال -مالني دمدومة .ملي نبغي نتزوج نقول للوليدة تجيب لي شي بنيه عندها 15 او 16 من تاونات عندنا الجبليات كيحمقو وفهاد لاج باقي مغيكون قاصها حتى حد اما بنت 22 سنة لا اخويا مغنهناش فخاطري وخا ديتها ...للأسف استاذ قاري وواعي وكيفكر بهاد الطريقة لكن سرها هي لي امنت لديب فصفة د راجل حاول يقنعها تلاقاه ما بغاتش حيت ميمكنش ليها ...معندهاش شي شبة اخرى كدير وهو يقلب عليها خيرها اما تلاقاه اما عمرها تشوفو او تسمع صوتو ...المهم خلاها الجلاخة دارها بيها ملي شاف راسو مغيوصلش هدفو دار فيها مقلق وقلب عليها ...مشات تحماق بالبكا كتصل بيه كتلقى تليفونو ساد حلت الفايسبوك لقاتو بلوكاها ...تما عرفاتو كاعي عليها طلبت فوزية تهضر معاه من الحساب ديالها وتصدمات ملي عايرها وقالها فرقيني عليك منعرفك ما تعرفيني وملي كاع سباتو سمعها اصناف الكلام الساقط .يا الشياطة يا السلقوطة يا ...يا.... تصدمات منال فيه لكن الله خلقو خلق غيرو كي قالت لها فوزية قلبي على راجل اخر كاينين اولاد الناس ...هما فعلا كاينيين هههه

هاد المرة تعرفات على سعودي ههه- شلونك حبيبي انت عمري ههههمنال بدات تاني كتحلم حيت السعودي قالها بلي بغى يتزوج بنت مغربية فعمرو 45 سنة قالها بلي مطلق وبنتو قدها ههه الهبيلة تيقاتو هو غالبا غيكونو عندو ثلاثة د العيلات الا ما كانوش ربعة ...عندو شركات واعمال ومعتاد يجي للمغرب وملي تعارفو مزيان خبرها بلي تزوج بالفاتحة زعما الزواج العرفي بزاف د المرات بمغربيات ...هي تخلعت وسولاتو ياك ما حتى هي بغا يتزوجها عرفي وحلف لها بلي بغا زواج عرفي - والله ابي زواج شرعي - لقاتو حافظ كاع القوالب فوزية اصرت عليها باش ينصبو عليه وخا يصيفط لها غي شي كادو والوا ما دات منو لا حق ولا باطل ...وباينة ملعق حيت كان تيدوي معاها بالساعات فالتلفون من السعودية ...وفاجئها ملي حكا لها على البنات لي بغاو ينصبو عليه ...هو مواعدها بالفلوس والخير وما يخصها والو لكن ملي يتزوجها البنت بدات تحلم .كيفاش غتفقص البعكاكات ديال بنات الجيران والعائلة .منال تزوجات سعودي ملعق وركبات الطيارة مسكينة وحجات وحلمت بلي دا محماد غيفرح بزاف حيت كاين اقاريد تاقتو البنية ...واحد النهار كتقلب حيت ولات دايرة عليه مراقبة وحراسة لا تديه شي واحدة ملي كاع عرفت بلي عندو ازيد من الف بنت فالفايسبوك والاغلبية مغربيات ...لاحظت واحدة غي تابعاه بالجيمات ودخلاتها عنده تما فين عرفات بلي كانت مزوجة بيه عرفي .وعاودات لها عليه العجب واخا في الاول البنت نكرات كلشي لكن طلعات رجولة وسلكاتها منو بلي راه مزوج ربعة وخا قالها زواج شرعي ملي غيجي غيقول هضرة اخرى حيت هو كيدير زواج المتعة والعرفي هاد العجب د الزواجات الي كيحللو بيه نزواتهم والحرام الي غرقو بيه بلادنا حيت بناتنا سايبات وما لقاو رجال لي يربيوهم ويستروهم ...البنت قالت لها بلي اكبر جلاخة وجلدة هو داك الراجل وبلي مكنملش لها حتى المبلغ لي دار معاه ...داك الشي باش مازال كدوي معاه فالفايس .فوزية قالت لها ما تيقيهاش غي كتكذب .لكن منال تيقاتها ملي كاع قالت لها على كاع هضرتو ووعودو ونفس الشي قالو لديك قالو للاخرى .والمصيبة العظمى ان منال طمعت وطمعها لاحها في الزوبية تصورات ليه بحويج شبه عارية وشفافة وصيفطاتهم ليه وشافها فالكام وشاف جزء من جسمها .بغات باش تشدو باي طريقة وحتى فوزية شجعاتها وداتها لدارهم حيت هي عندها بيسي وكام تما فين تعرات ليه الحمقة .كانت متاكدة بلي طاح في الشبكة .تاكدت بلي كاع البنات دار معاهم هكذاك وملي كيجي للمغرب كيبقى داخل خارج عليهم فدارهم وكيقل لدارهم بلي خصو شحال باش يقدر يدير عقد الزواج طبعا بعد ما كيغريهم بالفلوس والخطبة الغالية بالشي الفلاني ...وكيدور مع دارهم كيزوجوها ليه بلا عقد بالفاتحة من بعد كيهرب وما كيبانش ...ولي خلاها تتاكد بلي البنت رغبات منال تمشي معاه فنفس الخطة غي تجيبو لها للمغرب تفدي فيه ما دار لهم ...قالت لها بيناتكم .تصدمت في الشيباني وقلبت عليه بلوكاتو في الفايس والتليفون وتعرفت على مصري ما بغاتش الفرفارة تحشم هههه

المصري هذا مهندس وبوكوص تيحمق فالاول صحاب لها غي شي ممثل تركي تاكدات بلي .هو صيفط لها بزاف التصاور اصلا كان دايرهم فصفحتو وعاجبو راسو ...فرحات ملي قال لها ا-انا عايزك تكوني حبيبتي نعيش اقصة حب وبعدين زواج ايه رايك يا حلوة- منال دخلت متاهة خايبة الوعودغي كتشاير عليها من كل ناحية المصري غواها حتى هو بدات تهضر معاه فالحب والرومانسية حتى لقاتو واحد النهار كيرغبها تصور ليه ب دوبياس ههه ما بغاتش وبالصرار تاعو وافقات لكن بشرط انها تحيد الراس من التصويرة المصري هاج ...وطلبها تصيفط ليه صورة لفرجها هههه بعدما زعم عليها بزاف وكيهضرو فالجنس وكيديرو جنس عبر النت هههه مع العادة السرية يا لطيف اش هاد المنكر ...هي شافتو عريس لقطة ههه بوكوص قاري مهندس عندو عربية حلوة هههه المهم ولات مدمنة على الفايسبوك على ودو حسات راسها كتبغيه وتزعطات فيه .حيت المصريين عندهم مع الحب والرومانسية طيحها وكيقول لها غي القمر حبيب قلبي مراتي ...لالة منال بدات تاني كتحلم بالمصري حداها في المرتبة د العرس والعمارية والناس تحكي وتحاكي عليه وعلى زهر عندها ...كتقول لفوزية انا عرفة غنطيح على شي زهر نيت .وباينة هو هاد علاء المصري كنموت عليه ...كبر الحب غي فالنت حتى صوتو سمعاتو مرة واحدة عمرها شافتو مشات مع الوهم وصفحتو حافظاها ودايرة عليها برج المراقبة ...وخا كان مخبي قائمة الاصدقاء كانت تدخل للتعليقات والجيمات لي عندو وتما لاقات الحساب ديال خوه ...واجوتاتو عندها فحساب اخر كان عندها حيت فينما زبلاتها تحل حساب جديد ...مصممة تجيب عريس وخلاص ولو يكون من الصومال هههه....اجوتات خوه بدات تهضر معاه بالمصرية دارت راسها مصرية كتعرفو مخلات كيدارت باش يعطيها شي معلومات عليهم او على خوه علاء الحبيب د قلبها ...والو حتى لواحد النهار وهو يرمي صورة كاتب بلي ديال بنتو واولاد خوه علاء تصدمات ...تاني ودارت راسها ما عارفة والو ...مشات جربات علاء صيفطات ليه من ديك الصفحة ولقاتو نفس الهضرة قالها لها في الاول قالها للاخرى تما فين جفرات وواجهاتو بالحقيقة واعتارف في الاخير بلي هو مزوج وعندو الاولاد وخا فعمرو غي 29 .وقالها بلي بغا يخبرها وبغاها مرا تانية عرفها تزعطات فيه ...مسكينة دارت بيها شحال من مرة وعايراتو وبلوكاتو لكن ههدها غينشر تصاورها ...عاشت في الرعب مدة شهرين ما خلات هي وفوزية فين قلبو لعل تلقى فضيعتها .لكن تاكدت بلي كان بغى غي يخلعها ويخرجها منها ...تعرفات على واحد الليبي ما حشماتش ههه المهم الليبي طلع راجل وجا للمغرب لكن اكتشفت بلي حتى هو مزوج وحتى هو صيفطات ليه تصاورها كدير زبلة تابعة الاخرى ...الليبي قالها مرتو مريضة وبغا يتزوج عليها وتكون مغربية حيت صاحبو مزوج مغربية وشكر لها المغريبات ...فالاول بغات من بعد رفضات ملي لقاتو غي كيدخل ويخرج فالهضرة السيد صدق مخلخل مريض هههه الليبي جا للمغرب ماشي من العاكزين وعرفات بلي كيقلب على عنوانها وبدات كضرب فحناكها شنو غدير ....ومشات لفوزية قالت لها انت تخرجيني من هاد الورطة انت الي قلتي لي شوفي ليك شي ليبي هما رجال ومعندهومش مع الكذوب وشحال من صاحبتك تزوجات ليبي هاني طحت فهاد الهبيل ..المشكلة راه عندو تصاوري غيدير لي شي حاجة ...اخر ميساج خلاه لي قال لي غنقتلك الا مبغيتيش تزوجي بي ...اناري انت لي دخلتيني لهاد الفايس بوك اش داني ليه فوزية بقات كتفكر ما عرفات ما دير الليبي غيدير شي عمل احمق حيت تاكدو بلي راه خارج عقلو ومزعزع .وما خلا شي بنت من كتعرف منال ما خدا عندها النمرة باش توريه الدار ...الغد ليه قالت لها فوزية غي خليه ايجي لداركوم اش عندو ميدير كاع راه دابا الياحمق قد ما عاندتيه كيزيد فيه ...وفعلا طاح في الدار ومشى لعندهم فرح بيه دا احماد ههه الليبي كذب عليهم شي كذبات بلي كيجي هنا عند شي صاحبو وقال ليه بغى يتزوج نعت ليه دار با محماد هههه تهلا فيه بعدا حيت قالو ليه ليبيا عندهم البترول وملعقين المهم كلا وشرب وقالهم بلي غيجيب والديه من بعد شهر ويخطب دامحماد قال ليه كون جبتي غي هاد صاحبك نعرفوه بعدا قال ليه مرة اخرى المهم هاد المسطي ماديال زواج ماوالو صدقت لهم الخطة ونجاها الله الليبي مادار شوهة ما والو مشى فحالو لبيبا وعمرو ما رجع خرجات منها وحلفت على الفايس بوك وسداتو دازت مدة وتعرفات على واحد ولد الجيران عمرها ما شافتو حيت كيخدم ف خريبكة...عجباتو وعوض ما يصيفط مو تخطبها لبه قاله بغيت نتعرف عليك مزيان عاد نديرو خطوبة ...سميتو عماد وخدام ف ocp المكتب الشريف للفوسفاط النت سمعات و خدام في الفوسفاط خرجو عينيها حيت فوزية قالت لها بلي السالير طالع لي ما كيشد والو راه تيشد 6000 درهم وفعلا باينة عليه وعلى الحديدة الواعرة الي عندو فهاد الفترة منال زادت في الوتيرة ديال التقلاب على العريس كانت كتهضر مع 10 فنفس الوقت وكلهم كيقولو غيجيو يخطبوها والفايس بوك حيداتو ولات الهضرة غي في التليفون والهضرة كلها +18

منال صدقت اسم على مسمى وسهلة المنال لاقصى درجة عماد حتى هو لعب بيها ...غراها بالزواج وتاقت فيه كاع بزاف حيت هو جارهم مظناتوش غيخوي بيها .المهم الزغبية تعلقات بيه بزاف ومع هو نيت جذاب حروفو كحلين ومزغب حتى من صدرو عامر زغب الشي لي كان كيتيرها فيه بزاف ...المسخوطة كانت كتمشي عندو لدارهم وكتنعس معاه دغيا قنعها وحتى هي عجبها الحال .قفراتها خرجات من زبايل الفايسبوك لي كان غي هضرة في الجنس واخا شحال من واحد وراها العضو ديالو في الكام ...شحال ضحكو هي وفوزية متيحشموش كيشوفو فاعضاء الرجال معريين وعاجبهم الحالتما فين مشات منهم الحشمة والعفة .ملي قبلو بداك الشي المحرم يشوفوه ...كانت كتهضر مع واحد المراكشي ميسوى ما يصلح كيوريها راسو ف الكام وهو تيدير العادة السرية .ظناه حتى هو غيتزوج بيها وحتى هي كانت كتوريه اللور ديالها كيعمل عليه العادة السرية وكيستمني عليه ...لكن دارتها غي مرة واحدة وندمات بزاف وقطعات معاه العلاقة ...فوزية كتشجعها دير حتى هي علاقة جنسية قالت لها هما اولاد الحرام كيدوزو العجب وفي الالخير كيقول لك بغيت بنت عمر قاسها شي احد ...حتى حنا نعيشو حياتنا وحريتنا الجنسية بحال كاع البنات ياما دوزو وتزوجو .المهم منال قطعت صلتها بالحشمة والعفة ولات تهضر في الجنس عادي وتقول الكلام الساقط بتلقائية بلا حيا ...وهاهي اول مرة كتنعس مع راجل وكان هو عماد لي شمتها بعد ما شبع فيها ...الشماتة تاقتو شكون قالها غيديها وهو مكلف راسو حتى يصيفط مو غي يتكلمو فيها ...دارت معاه علاقة جنسية وخا سطحية وغير كاملة ...وبدا كيطالبها يمارس معاها من الخلف الشي الي مقبلاتوش وتعايرات معاه . تما فين طرشها وصدمها حيت قالها - شوفي تما عندك قداش يعلم الله لمن عاطياه كاع وجاية ديريهم علي - ضرباتو بطرشة وهي كتغوت عليه - نستاهل انا لي درت فيك راسي انا بنت شريفة ماشي من داك النوع .وبقى كيضحك وقال لها - واش كديري عندي هنا يا الشريفة . بقاو مني منك حتى ضربها ومن تما بقى ديما كيضربها ودار فيها ما بغى .هي باغياه ومتشبتة بيه حيت هو اول واحد نعسات معاه وهو الوحيد لي عراها وشاف لحمها وخا مضيعش لها غشاء البكارة ...لكن ما مشى حتى دا داك الشي الي بغا وكيمارس معاها عن طريق الدبر والعياذ بالله ...بدات كدي عليه وكتموت عليه حيت عرفات معاه المتعة الجنسية .ومستعدة تصبر على عصاتو وعلى كلشي غي تزوج بيه .كتعتابرو راجلها الي ما مزوجش بيها هاد الشي كامل ولالة اجى مادات ما جابت حيت هي ديما خارج التغطية ودا محماد مقابل غي البيع والشرا وكيجمع فاقاريدن وكيخزن فالبنكات ...ولات ديما خيطي بيطي لدار عماد ملي كيجي حيت وللا كيجي بزاف في الويكاند السبت والاحد لدارهم ...دارهم عافينها مشات عند فوزية او جات من عند فوزية ...بدا عماد كيتهرب منها لدرجة مبقاش كيجي في السبت والاحد وملي كتلح عليه يجي لدارهم كل مرة يقولها سبة .- لا راه تحولت ل بن جرير خصني نكري ونوجد عاد نجي لا راه حبسو لي الخلصة .المهم ملي عاقت بيه وزيراتو .سد التليفون وضربها بغبرة باش غي يتفك منها ...باعت راسها بالرخيص وطاحت غي الكلب على خوه ...مشات كتبكي على فوزية وهي ندمانة .والحرامية ديال فوزية قالت لها اوا صافي ياك غي ملي متقبكش او حملتي منو هانية ...منال ماتسرطتش ليها قالت لها راه اول واحد نعست معاه جاوباتها- كلنا طرا لنا هكذاك وبخير .فوزية بحال الى فرحات بلي طرا لمنال ما مشات حتى جراتها لنفس الطريق ...الصدمة الكبرى ان عماد بعد مدة من الاختفاء جا لدارهم ودار العرس تزوج بواحد البنت كلشي كيعرف بلي خارجة الطريق ...خاصة منال وفوزية لي ياما شافوها كل مرة حطاها طوموبيل فشكل هههه العقلية عند الرجال لا علاقة المهم يستاهل وحتى هي تستاهل حيت عطات الحاجة الغالية الي مكتعطاش ولو بالذهب والملايين.

وعوض ما تجمع راسها فلي جرا لها خاصة من حسن الي بقا لاصقها بحجة انو كيبغيها وخا ضحك عليها بغا يتزوج بيها مسكين .طامع ف فلوس دا محماد والله لا دا منو باش ينقي سنيه .تفكات منو غي بزز وبقات من دا لداك فيهم الي تلاقاتو والي خرجات معاه والي باسها والي عنقها والي كيهضر معاها فالتلفون فالجنس .المهم بهدلات شرفها مزيان دارت كي صاحبتها فوزية الي بدا كيتنادم معاها الحال .ولات كتصلي وجمعات راسها لقات بلي الي جا كيمسح فيهم صباطو .منال معجبهاش الحال مازال مصممة تلقى عريسها خاصة ملي وصلات ل 26 سنة وعمر شي حد خطبها ...مازال كتهضر وتعارف بعض المرات غي كتقدر النوامر .وكطيح فيهم غي هما كلشي بغا يخطب ويتزوج لكن غي كذوب ...سمعات شي بنات في الحمام كيهضرو على سي مواقع د الزواج ودخلات لهم وخا ضربات على الانترنيت شحال هادي لكن قالت اللهم الانترنيت ولا الواقع الي جا كيمسح في سباطو كي قالت فوزية الي بعد توبتها بعام مابقات تخرج ولا درج ولات كتنصح منال لكن مكتسمعش لها هي الي خرجاتها الطريق وشجعاتها ولات كتكتحاول تردها ليه .فوزية شحال من واحد ضحك عليها وحتى واحد ما داها .مشات فواحد الصيف لبلادهم في ورززات تما شافها ولد عم باها واحد الدري سبحان الله زيتونة كحلة محطوطة وخطبها .وفوزية قبلات بلا تردد دارت كلشي تما خطبة وعقد وما قالتش لمنال حتى جات لكازا باش يوجدو للعرس تما فين منال كعات عليها ومبقاش عندها معاها ...المهم فوزية مشات عندها وتسامحت معاها وعرضتها للعرس وملي منال شافتو لا زين لا مجي بكري عاد بردت وبقات كضحك وتشطح ..العفريتة غارت منها .وخا هكداك صدق لها راجل وولد الناس مهلي فيها وبدارها ولدت وليد دغيا مضيعتش الوقت .ودا محماد ولا كيعاير منال بيها وحتى مها -سيري شوفي لالاك فوزية دارت اولادها ودارها وانت غاملة لينا هنا .ههه مساكن ما عارفين والو الحمد لله لي كيستر على عبادو منال مشات تحماق فعمرها 30سنة ومازال ما جاب الله وحتى احد مكيخطب فيها خاصة ملي ضرب لها عماد الطر بين اولاد الحومة ملي رفضت ترجع معاه .وزيد عليه دا محماد صعيب وحتى احد ما زاعم عليه ...المهم منال بدات كتمرض فاعصابها وغي كتبكي وديما سهرانة وندمات بزاف على ما دارت

واخا فعمرها 30 سنة غادا وكتزيان لكن حتى احد ماخطبها خاصة ملي وصلات هاد السن .ولات عايشة فكلآبة وملي كيكون شي عرس فحومتهم كتموت الف مرة وما تسمعش النكافات كيصليو عللاى النبي كتقطع ملي كتسمع داك المقطع ديال الف هنية وهنية يا لالة العروسة فالعمارية .البنات الكبارات كلهم تزوجو ودابا كيتزوجو الصغارت بنات 16 و18 مرضات مرضة خايبة وولات كطيح وكتغوت داها باها عند احسن الفقها ديال كازا والو ما جابوش فايدة شبعات رقية لكن مازال كطيح وبزاف كاع ملي كتسمع شي عرس او شي خطبة حس الزواج ولا كيمرضها .وكيزيدوها العيالات مسكينة وشحال زينة مخصها طول ولا غلظ ولا زين الله اربي ...واكثر حاجة كتسالي معاها ملي كتشوف عمتها رقوش الي عمرها تزوجات مسكينة كبرت عازبة ...كتمرضها لدرجة ما كتحملش تشوفها او تهضر معاها ملي كتجي عندهم ...فوزية بقات فيها منال وخا هكداك منساتهاش وجابت لها عريس .لكن منال عاد زادت مرضات ملي شافت العريس راجل كحل زيتونة بحال راجلها وزايدها كبير 46 سنة محملاتوش عاد ما كملات عليها .فوزية رضات بصيبها وقنعات براجلها ولاتدايرة طوموبيل ودارها وكتجي بزاف ملي دارو الطوموبيل وعندها ثلاثة د الوليدات متابعين .خرجو سميمرين بحال مهم ...كتحاول تفوج على منال والو ما لقات لها حل .منال بغات دير حتى هي دارها لكن مع مواصفات فارس الاحلام الي بغات ماشي مشكل يكون واصل ربعين غي يكون شوي زين وبخدمتو ودارو ...حتى احد ما تقدم لها مشات لعند الشوافات سببت كتبات ما خلات ما علقات فعنقها وجنابها ويديها من حجابات وكتوب ما خلات ما بخرت والو ...واحد النهار كينتاقدها باها وكيغوت عليها وكترد عليه قالها - سرك غي ملي برتي ما تستاهليش الشيطانة كتردي علي ... عمرها سمعاتو عايرها بالبيورية تما طاحت كتغوت وكضرب راسها مع الحيط ويديها حتى ولات كلها دمايات ...وطاحت غيبات داوها للسبيطار وقالو لهم عندها انهيار عصبي من تما ولات كتاخد الدواء ديال الاعصاب زعما الفنيد ديال الحماق كي كنقولو ...جات فوزية فواحد الصيف ولقاتها حالتها حاولات معاها بكل الطرق والو منال ذبلات وضعافت وزراقت ووجها كيبانو فيه غي العظام نهار متاخدش الفنيد كتعصب وكتبقى غي تغوت ...فوزية ولات كدير النقاب وكتحفظ القران حفظات 15 حزب بفضل الله ولات انسانة اخرى .لسانها كينطق غي بذكر الله والوعض والارشاد والحديث والكلمة الطيبة ...دا احماد عزيزة عليه فوزية ههه ودابا كاع بزاف داك الشي علاش ما مانعش تمشي معاها تبدل عندها الجو في ورززات حيت راجلها ولا كيمشي لبرا .ربي كرمهم بفضلو وقد ما فوزية كتعلق بالدين وبالله وكتقنع الله كيعطيوهم وينعم عليهم ...دارت معاها المزيان الي ما داروه معاها خوتها الي حتى واحد مكلف راسو يديها عندو غي سيمانة ويقابلها غي تفوج شوي ...مشات لورززات مع فوزية

دار فوزية كتفوح منها ريحة الايمان وديما القران خدام شحال بكات فوزية وطلبات الله يغفر لها لدرجة كانت كتقيم الليل حتى كيطيبو رجليها عرفات الايمان القوي ولات انسانة وزوجة صالحة بمعنى الكلمة ...منال غي ساهية وساكتة كتشوف مبقاتش كتهضر وفوزية كتهضر حتى كتعيا والو الي يجاوبها وكتبقى غي تبكي وتندب وتقولها انت كنت بنت صالحة انا الي خرجت عليك ...ياربي عاونها وعاوني باش نقدر نخرجها من هاد الشي مغاديش نسمح لراسي الا خليتك هكذا ...بشوي بشوي منال بدات كتونس باولاد فوزية وكتلعب معاهم كتحماق على الدراري ...فوزية ديما ملازمة منال ومقابلاها وداتها لعند واحد الصد يقة ديالها ماشاء الله مراة صالحة تعشق غي تشوف النور الي في وجهها .ككتانت كترقي العيالات وتبعات معاها منال ...وبقات مداماها حتى بدات كتخرج من حالتها الخايبة وساعدها السفر والجو ديال النكير تاع باها الي بعدات منو .بدات كتهضر مع فوزية وتجاوب معاه شوي بشوي كتسمع لنصائحها .وكتمشي معاها للدروس ولاو كيحفظو القران تما منال عرفات بلي قصرات فدينها وبزاف وبلي كل ما جرى لها جزاء ليها من عند الله على كل مادارت ...ندمات اشد الندم على مادارت في الماضي ونسات بلي الله تعالى وصى المراة تصون شرفها ودير العز لراسها اكتشفات بزاف دالحوايج زينين في كتاب الله ملي ولات كتحضر لدروس تفسير القران ...فوزية دارت فيها خير وخير كبير والحاج محماد هو مراتو طلعو لورززات يشوفو منال .بغاو يجيبوها معاهم لكن فوزية رفضات قالت لهم غي خليوها مازال حتى تعافا مزيان شافوها ورجعو فحالهم ملي طمئنو عليها ...بدا كيرجع فيها النور وصحاحت تاني وزيانت وحيدات الدوا د الاعصاب حيت لقات اخيرا دواها الي هو القران والايمان ...عاشت شهرين مع فوزية فدارها شهراين كلها ايمان وقران وعظ استطعات تخرجها اخيرا من الكابة وخا منال مازال ما سمحت لراسها على ما دارت في الماضي كتشفات كيفاش كانت مغفلة وعاصية وبكات حتى سخفات وقالت لفوزية علاش ما مشيناش فهاد الطريق من الاول .المهم قتانعات بلي الزواج امر ديال الله وهو الي كيفرق الارزاق وكيكتب لكل واحد نصيبو وقدرو .وبلي كانت غالطة وغلطة بزاف بلي الي طرا لها ابتلاء من عند الله باش ترجع للطريق ...دازت شهرين وسمعت منال فوزية كتهضر مع راجلها عرفت بلي قريب يجي من الخارج .ملي كملات فوزية مشات عند منال للبيت ولقاتها كتجمع الحوايج قالت - والله لا مشيتي حتى يجي عبد الله ونمشيو مجموعين منخليك تمشي وحدي وحتى انا غاديا نطل على الوليدة ...منال مكرهت تبقى معاها ديما تعلقات بها وخايفة تمشي لديك الدار لي فيها غي الذكريات الخايبة

جا عبد الله من الخارج ومعاه شي ناس استقبلهم فدارو .داك النهار منال وفوزية ظلو فالكوزينة كيوجدو الشهيوات ...والرجال في الصالون طبعا هما مدخلو عندهم ماشافوهم .حيت فوزية منقبة ومنال عرفات بلي الاختلاط محرم المهم كلاو الرجال وكانو خارجين منال .ظنتهوم مشاو تمات خارجة من الكوزينة تما طاحت عينها على واحد الراجل ما شاء الله النور على وجهو داير لحية خفيفة ولابس الكلاص ولي زادو هبة ووقار وسامة شعرو ال كان كثيف وفيه شوي د الشيب من الجناب .الوقت الي هي خرجت من الكوزينة الراجل اول من كان خارج من الصالون طاحت عينيه على منال جات عينو فعينها .كانت لابسة كسوة طويلة فالغوز لباس محتشم ودايرة خمار فالابيض بين خدودها جات بحال شي وردة بلا مكياج .ملي شافتو منال رجعت اللور بزربة ودخلات الكوزينة ...وهي كتقول اعوذ بالله من الشيطان الرجيم الرجال عاد خارجين سحابلي خرجو قبيل ...فوزية بدات تضحك علاه مالك اختي راكي لابسة حوايجك وحجابك ...قالت لها - اه ضحكي علي انت دايرة نقابك ومستورة وكتقولي لي مالها ...ضحكت فوزية وقالت بلا متهز راسها وهي كتمسح الطباسل.فيها خير اصحبتي فيها خير ..يومين و غيمشيو مجموعين لكازا فواحد الصباح فوزية دخلات على منال البيت وهي مبتسمة وكتفيقها بكري نوضي الالة العروسة نوضي ...منال ما فهمات والو عمرها فوزية ما قالتها لها ...منال وهي كتحك عينيها وكتفوه - اسعد الله صباحك اشمن عروسة كضحكي علي ...تما فوزية عاودات لمنال على يحي لي هو الراجل الي شافتو ول البارح .خبراتها بلي بغاها للزواج ...منال جمدت في بلاصتها شحال هادي كستنى هاد اللحظة اخيرا كرمها الله بالزوج الصالح وسبحان الله تقدم لها من نظرة واحدة ونظرة مزروبة ...منال غرغرو عينيها بالدموع وقالت حمدتك اربي وشكرتك وناضت توضات وصلات جوج ركعات حمد لله وصلات الاستخارة وطلبت الله الى فيها خير يعجل بيه الله ى.وسبحان الخالق القهار الرزاق ...منال ما بقاتش غترجع لكازا نهائيا حيت غترتبط بيحي وغتمشي تعيش معاه ف كندا ...نهار ربي كتب لها رزقها جاها حتى لعندها بلا ما تقلب ما تعري ما تغري ...دارت عرس دايزو الكلام غي بالامداح وما فيهش اختلاط ...عطاها ربي زوج صالح الله يعمرها دار كان فعمرو 42 سنة .عايش كندا سبق ليه تزوج كندية وطالقو وعندو معاها بنية عايشة مع امها الي ما بغاتش دخل للاسلام داك الشي علاش نفصلت هي ويحي ...ويا سلام على الح الحلال ...داك الشي علاش منال كتوصي وتعاود كاع البنات بلي رزقك غيجيك نهار يكتب ربي غتزوجي وممكن يكتب ليك احسن ما تمنيتي ...البنت تستر راسها وتصلي صلاتها وتبع دينها وتحافظ على عرضها .راه كثرو اشباه الرجال الي كيضحكو على المغفلات وها منال عبرة لمن لا تعتبر .والحمد لله ربي قبل توبتها وعفا عليها ورزقها الوج الصالح وتزوجات في ظرف اسبوعين دارت كلشي وولات زوجة وزوجة صالحة لزوج صالح. اذن البنات ديروها شعار الحب الحلال او بلاش ولي متزوجاتشي تسنى رزقها راه التصاحيب والخروج غي معصية ومعرفتيش بلي ممكن الله يعاقبك عليها فالدنيا قبل الاخرة كي جرا لمنال .اذن الحب الحلال ولا بلاش

قصص مقودة

قصة منال

لا يوجد تعليقات

أضف تعليق

تابعنا على

المشاركات الشائعة

عن قصص مقودة

التسميات

إتصل بنا