طلعنا الكار أنا وعمتي ….. بقات كلثوم وبالمعطي كايشييرو لينا بيديهوم تا مابقيناش كانبانو ليهم ما حسيتش،براسي و بكيت بكا نيت ديال بصاح ….. قالت ليا عمتي موحماد مالك ؟؟ قلت ليها واااالو أعمتي غا فراق هد الناس جاني صعيب بزاااااف خيرهوم كثير عليا و عمرو إتنسا ليا …… و العجب أولدي ملي كانت بعد مك باقا فالحياة ديما كاتغوت و ديما مبرزطة من جهتك كاتقول بلي كاتشكي ليها على براهيم لي كنتي،خدام عندو وبلي كايتعدا عليك و كايضربك …….. أه بصاح أعمتي و لكن راه ماشي كاع الناس بحال بحال براهيم داكشي لي كايدير معايا ماشي،بخاطرو براهيم غا كربوز كبر تا هو فالجوع و التسرفيق والعذاب وداكشي لي داز عليه كايدوزو عليا ……هدو العكس ديالو كبرو فالخير و لد الخير وكايتسرفو بالخير وهدي هي الحياة أعمتي ……. متديرش فبالك أولدي علاش مالك معول باش تبقى فالبلاد ….. راه غادوز معايا شوية وغاترجع لخدمتك و ماتفرطش أولدي فدوك الناس ملي مهليين فيك ولقيتي فيهم داكشي لي بغيتي و باينة فيهم ولاد الناس، ……. عمتي خاصني نخرج ليها من دماغهاهد القضية ديال نرجع عندوك الناس باش نكونو واضحين كلثوم و بالمعطي و نعيمة و الحاجة والطبقة من سبع المستحيلات باش نتلاقا معهم مزال حيت تا أنا معول ندوز نيت هد المرة فالبلاد طلعات ليا المدينة فكري ما بقيتش قاد …… لا لا أعمتي دوك الناس،صافي تقضى معهم الرزق هد اليامات غايمشيو إسكنو فشي،فيلا و فيرمة ديالهوم جوايه الشمال الدرية غا يد،وحدة وباها راك شتيه راجل كبير و قاليهم مابقيتش،قد على الصداع ديال المدينة …….. عمتي مجاوبتنيش سكتات معجبهاش الحال حيت كاتشوف يعني ما بقى عندي تا شي،باب غا ندقو يعني بحال واااالو غا نشد،ليها ركنة فالدوار وصلنا لتزنيت نزلنا فالكار قالت ليا عمتي …… وسير أولدي أموحماد جيب شي خضرة و شي دجاجة و لا شي كيلو د،لحم راه الدار كيما خليتها كاتسفر هادي عشر يام باش،خرجت منها …….. جاب الله باقا عندي واحد الفين ريال من داكشي،لي عطاني با المعطي …… مشيت تقديت بيه دوك التفتاف ورجعت الكار وصلنا للدوار و الناس كايجيو إزورو عمتي حيت رجعات …… الناس،ديال الدوار تا هما كلهم ولاد القحاب نهار هزاتها لومبيلونص فالفيلاج تا شي،قواد و لا شي قوادة ما تشجع و لا بانت فيه شوية ديال الإنسانية ولا يقول هادي جارتنا وكبرات معنا و كبرنا معاها غانطوع و نمشي نوقف معاها ……. جات بوحدها فلومبيلونص تا كن جاب الله ماتت كن ماديك الجمعية لي تكلفو بها و الله مغانعرف …… وصلنا لدوار أناوعمتي لقيت دارنا بدات كاتريب حلمي فصغري هو نرممها و علاش لا نعاودها كاع تبان تا هي بحال ديور عباد الله و دار عمتي تا هي لقيناها كيما خلاتها فراشها باقي كيما خلاتو مفرش مغبر و شي أتاي غمال فالبراد و ريحت الغمولية عاطية عمتي جات و جابت معاها خنشة ديال دوا ها قبل الماكلة ها بعد الماكلة ها وسط نهار ها إلى خريتي ها إلى ضرباتك الفيقة بليل …… و لكن عمتي مرا جاهلة (ماشي أمية ) بقا كاتأمن بداكشي ديال الشعودة و العشوب والحروز ضربت معاها تمارة باش تشرب دوا ديالها قالت ليا واش أنا تا دوزت 55 عام فحياتي بفضل الله و هد العشوب عاد غانتسنى فوحدة ماستراش تا شعرها توريني شنو إنفعني واشنو غا يضرني ……. قبر الواليدة كنت كانزورو كل صباح مورا الفجر ديك خمسطاش اليوم لي بقيت فالبلاد عيييت مابقيتش حامل دارنا نشوفها مابقيتش حامل دوار ما عندي ماكاين لاباك لا مك لا خوك لا ختك شنو لي غايبقى شادني هنا إبقاو إشوفو فيا هد ولاد القحاب ديال دوار شوف ناقصة على الأقل المدينة سترة عيبي و كلشي كايديها فزك شغلو تمشا كاع حفيان ولا عريان مكاينش لي كايعرفك و مكاينش لي مسوق ليك ……. فتحت مع عمتي الموضوع ديال نرجع المدينة ولكن مابغاش إدخل ليها قالت ليا لا لا أولدي كنت غانخليك و مغانشدكش لو كان قلت ليا غا ترجع عند دوك الناس ولكن دابا مكاين لاش تمشي تكرفص تاني و تبهدل كيما كنتي ملي كانت مك بقا حية بقا معايا أولدي و نسني و خليني نحس بيك وتحس بيا رزقنا باش نعيشو مغايخصناش ……. أه بصاح ماسخيتش بيك أعمتي ولكن باش نبقى جنبك هداك ماشي،حل أنا باقي صغير خاصني نخرج نعري على كتافي و نقلب على راسي أش غانبقى ندير فهد جبال هانتي كاتشوفيهم كحلين و مكحطين و هد الشجر ديال أركان لي عندنا واش أنا غانتسنى فيه تايدور العام باش نسوسو و نهرسو ونعصرو باش تخرج ليا كل شجرة إترو ولا قل تمارتو غلى من تمانو لا لا عمتي خليني نمشي فحالي ….. هد المرة مغاتمشيش أولدي أموحماد هكداك أنا لي غانصيفطك و غانعرف فين صفطك ……. فين غاتصيفطيني يا عمتي ؟؟ و حنا ماعندناش حد و كن كان شي حد إقدر يوقف معانا كن وقف معاك ملي كنتي كاتلاوحي فالسبيطارات بين أكادير و مركش ……… يتباع ………
لا يوجد تعليقات
أضف تعليق