الحلقة 10: كنخسر الهضرة حيت ما كنحملش نماكي لشي حوايج باينين والستيلو بوحدو للي كيبدا مكيبغيش نوقف، قحبة مثلا مغديش نكَوليها بائعة الهوى باش منجرحش بنادم
فاش كنخسر الهضرة، ماشي حيت أنا خاسرة، أو كنت خاسرة، غا هو وكان مكنحملش نماكي لشي حوايج باينين، باش تصور الواقع ميمكنش تختار كلمة بكلمة، حيت ديك الساعة ماشي انا الي كنكتب، الستيلو بوحدو الي كيبدا و مكيبغيش نوقف، كنعيا فيه، قحبة مثلا مغديش نكَوليها بائعة الهوى و لا الخرا باش منجرحش بنادم، كنضبر على كري شنو غنكوليها بشي لغة أنيقة لا تخدش اذن المستمع الضريف، هاد الضريف ولد الناس هو النيت الي كتلقاه كيديرهم بسطاش، كيتلوط على الكبيرة و الصغيرة و الحاملة و المجوجة والزوينة و الخايبة، شبعان تناقض تا هادوك الي كيكولو على راسهم فشكل و حنا متفتحين و حنا مع الحريات و مع النم هاداك نيت نهار يبغي يتجوج عمرو ما غيقلب على صاحبتو، غتجوجو ماماه من دوارهم، معليناش، مسعودة مغديش تخسر الهضرة من هنا الفوق، غتهضر بالعبار، بالصواب و التاويل، معرفتش كي غيخرج دكشي، غنخبي الشمش بغربال، غنلبس حوايجي قبل منكتب، و قبل ما نحط الكلمة غنقلب على بزاف بحالها و نختار الخفيفة فيها...
معليناش، دابا نيت فاش بغيت نعاود الحلقة د اليوم ، بلا ما حسيت براسي، حليت شعري، مسحت وجهي من الماكياج د النهار، طفيت على البوطة، و درت موسيقى زوينة، موسيقى قولباتني، بدا ديسك مكنتش عارفة راه عندي، يا الميمة، نوصيك وصايا...بلا ما شعرت نضت طليت على بنتي فبيتها واش نعسات، واش مرتاحة ففراشها، حيت فاش كنت برهوشة معمر طل عليا شي حد، نعست ولا منعستش، مغطية ولا ظهري عريان ولا ما بايتاش كاع فالدار، راجلي باقي ما دخل، مكيتعطلش فالخدمة، مؤخرا بدا يديرها، شكيت اكثر من مرة انه عرف شي وحدة بحال مسعودة، محاولتش نسول ولا نعرف، مكنقدرش على الصداع، عييت، مفياش الجهد، بحال شي واحد سالا من الحرب، كلو معطوب و مقصح، غير الى عفطتي عليه اتقصحو، هاكاك وليت، باغا غا التعادل،
كنكتب سطر فدقيقة، كنسهى ساعة، باش غنبدا، كيفاش أنسالي، كملت خمسطاشريوم مع سعيد، دازت مزيانة، معمرو كالي شي هضرة ناقصة، وعاد كيدور معايا مزيان،عروبي ولكن خصيم، مزال كنكولها صونا عليا، وجدي راسك هانا واحد نص الساعة ندوز عليك، واخا فين أنمشيوا؟ كالي را صحابي كراو شي فيلا حدا البحر، و جايبين صحاباتهم، ونتي هي صاحبتي، يالاه معايا، نريحوا شوية فالدار، ناكلوا الحلوة...وراني عاوتليهم عليك، وباغيين يشوفوك و يتعرفو عليك...بقيت ساكتة شحال، كنفكر شنو ممكن يكون كال؟
كاليهم مثلا مسعودة بحالكم، مسعودة فوطوكوبي منكم، غي هي قارية شي شوية،ولا كالهم هادي واحد الصلكوطة كنعرفها باغا ضبر على راسها،،مهم شنو ما كان كالهم، انا ما رتاحيتش لديك الليلة، قلبي مزير عليا، وشداتني واحد الخلعة فشكل، النفس كيتحبس فيا، كنتنفس بصعوبة بحالا هازة شي جبل فوقي، بقات غا شي ربع ساعة ويجي عندي، مع كل تيك طاك ديال الساعة ضربات قلبي كيتجهدو، بحالا بغا يسكت، فالخر كتبتلو ميساج، حبيبة سمحلي، منقدرش نخرج اليوم، فيا الوجع، خلي تال غدا عافاك، كتبتو و بقيت نشوف فيه، نسيفطو ما نسيفطوش، كنتت باغا غي نتفك من داك الاحساس الخايب الي جاني، فاش قراه كعا مزيان، لدرجة بدا كيسب و يعاير، و سمعني مزيان، وراني واحد الوجه شحال وهو مخبيه، مخلالي غا الي نسا، نقالي ودني، مجاوبتش، حيت كاع دكشي الي كال حقيقي، مكدبش عليا، استغلالية، صوبيصة،كلكم بحال بحال، شهر هادي وانا هازك و الليلة الاولى باش بغيتك دفعتي كبير، قولبتيني، والله لا بقات فيك يا القحبة، قطعت التيليفون، تجبدت فبلاصتي، وحسيت بجسمي كلو بارد، واحد التبوريشة طالعة معايا من رجلي، عيطت على البنات الي فالبيت لاخور باش يجيو عندي، مسمعونيش، كانت الغوتة الداخل، كنسمعها غي بوحدي، بحالا طايحة فشي بير غارق حليت عيني، الضو مجهد، ابيض، كيعمي العينين، هدا ماشي بيتي، بيتي مضلم و حيطو موسخ، لقيت راسي فالمستعجلات معاقلة على والو
لا يوجد تعليقات
أضف تعليق