الحلقة 9:" الفقيه ولاّ كليان ديالي.. خذيت الفلوس و ورديت لو حجابو، الفلوس هوما الحجاب اللي كيدير القبول و كيحيدو العكس و التابعة، وكيديرو الطريق وسط البحر."
حتى انا عندي رأي فكَاع داكشي لي طاري فالبلاد، وبغيت نكَولو.. بغيت داك القائد د بن كيران يسمعني. ماتكونوش قباح، وتفهموها بالداريجة القاصحة، انا كندوي بالفصحة، ياك القوادة من قاد يقود، و بن كيران هوالقائد، زعما هو لي مقودها على هاد البلاد، ويلا كان بصح باغيها تزيد القدام خصو يسمع و يتمزك مزيان للناس الي بحالي، داخل سخون بحال الدخلة د العرايش، من بعد ونعاود ليكم هاد الدخلة د العرايش كي دايرة، داخل بسلامتو شاد بيدو واحد جليليبة بيضة محيدقة و طريبيش حمر بحال شي برهوش عاد تختن، و فيدو التانية هاز بلغة صفرة مصمقة باغي يقتل التماسيح، سحاب ليه بوبريص، حتى ولا بوبريص عندو الشان اكثر من ديال لاكوصط.
غير حال فمو وسنانو بحال المقص طالع هابط ينقص فداك صندوق المقاصة، اجي بعدا ياك داك صندوق المقاصة كالو غينقص لينا فالزيت و البوطة و الخبز، غنولي نخدم غي شوية، نهار طلع بن كيران المرة الاولى تخلعت، كَلت صافي قودناها،لاراف المخيرة تجمعنا، ساعا بنادم تزير، وكلشي سخن، عاد تزاد الرواج و القضية زهات.
نعاود ليكم حكايتي مع الفقيه. خونا الي كنت كنتلاقاه فالربعة د الصباح، عاد راجعة جارة رجلي بالكشايف، انا داخلة هو خارج، كيشوفني و يدفل و يعاير، وسختو البلاد و داك الديسك ديالو راكم عارفينو، جات عينو فعيني، حدرت راسي وزدت،كمل الطريق، و فنفسي كنعاود المعيور ديالو، حافظاه، بانلي سكت،ما سبنيش، ما فهمت والو، شوية كنسمع الخطوات ديالو راجع، قربوا بزاف، شداتني الخلعة، عنداك يدير فيا يدو، عنداك يجاهد فيا، مكاين الي يعتقني، كاينة غي انا وياه.
طلع فيا و هبط، ، سولني فين خارجة فهاد الوقت؟ بقيت كنمضغ المسكة و نحنزز فيه، مخنزرة و مخرجة عيني مزيان،واخا فالداخل كانقفقف، كَتلو أنا داخلة للزنقة، انت الي خارج ليها، وطلقت واحد الضحكة ديال شي حد فرحان،ما خصو تا خير، أنا خدمتي فالزنقة، راسمالي فالزنقة، الزنقة هي داري، وانت عارف وانا عارفة، الي معرفتش هو شنو جاك اليوم أسي الفقيه؟ بان لي حشمان، مخلوع اكتر مني، كيهضر معايا و حاضي جنابو لا يشوفو شي حد معايا، واخا كَاع ايشوفوه، تاحد ما ينويها فيه، ايكَولو را غي كيطلب ليها الهداية، وكينصحها، تا حد ما غيكَول را تا الفقيه بغا ياكل الحلوى، مصدمنيش فيه، وزايدون ياك ما محبة غا من بعد عداوة، وانا و السي الفقيه عداوتنا طولات، و الدفال الي كيبزق فالارض وقت ما شافني سالالو...وهدا جهد الي ما يصبر.
بغيت نشد فيه شوية، سولتو واش عندك مع الما لحمر؟ استغفر الله، الله يبعد علينا الحرام، خراني بالضحك، هي أنا غا ضرب بيا الكاغيط و تكمل نص دينك، كَالي لا، عندي غا مع ماء الحياة، ياك وجعلنا من الماء كل شيئ حي، ونتي تبارك الله، فيك الحياة، وكلك حياة، وانا فيا الما. كتحللو الي بغيتو و تحرمو الي بغيتو، معليناش، شغلك هاداك، انا خصني غي اللعاقة، داخ الفقيه.
عجبتو، ولا كليان ديالي، مبقاش باغي يتفرق معايا، غا هو مكيخرجني فين، الليلة الي مكيشوفنيش،كيفرع لي راسي بالتيليفون، مور العصر، قبل العشا ،مع الفجر، واخا كيعرفني خارجة مع شي حد ماكيكَول والو، فاهم بالي الوقت صعيبة وانا خصني نتقاتل، اخر مرة معاه، خليتو ناشط، فرحان، واصل للسما السابعة، توضى وسالا ، تخشع و هز يدو للسما، بقا كيدعي معايا، بزاف ديال الدعاوي مابقيت عاقلة على تا وحدة، فاش كنت خارجة مد لي واحد الحجاب، كَالي متحيديهش من عبونك، و عنداك تحليه، تال الليلة الخامسة، فاش تكمل الكَمرة، وتصفا السما من الغيام، خديت فلوسي ورديت لو حجابو، الفلوس هوما الحجاب ديال بصح، هوما الي كيديرو القبول، هوما الي كيحيدو العكس و التابعة، وكيديرو تا الطريق وسط البحر.
لا يوجد تعليقات
أضف تعليق