الحلقة الاولى: أول خرجة للواقع، أول مرة غيقيسني شي ز***
قررت نمشي، غنخرج معاه بوحدي، كانت فيا الخلعة بزاف، ولكن الجوع اقود من الخلعة، مكيخليكش تميز دكشي لي كدير، الشومبر ديالي رقم تسعود فالعمارة سبعطاش، ساكنة فيها أنا واحد الساطة من سيدي علال التازي، نهار كامل كتسمع القران، و بالليل كتهبط عند صاحبها لكولوار ديال الحي، كطلع تا كيقرب الفجر، كدوش نيشان وتصلي الفجر و تنعس، كنكون باقا فايقة، مكنعسش الليل، ديك الساعة مزال معرفت لاش مكنعسش
معليناش، هداك موضوع اخر، مشيت جبت واحد الصباط طالون من واحد البنت فالشقة التانية، لبست واحد التريكو مخلياه غا لمناسبات بحال هادو، ديكولطي، كتبان منو الفرقة ديال بزازلي، كيعجبني الحال، كنحس براسي بنيتة، خرجت عندو جوايه التسعود دالليل، ماكيت شوية، وهبطت، وسط الساحة د الحي، حلقية د الرفاق، محاكمة جماهيرية لشي واحد لقاوه مدخل جمتو لبيتو، كانو كيعجبوني الرفاق فالاول، فلخر لقيتهم أغلبهم زوامل، كلشي باغي يوسع النقاش ويعمقو
مكانتش كتفهملي هادي فلول، من بعد عاد فهمت أنها بكل بساطة باغي يفرعليك كرك بالمبادئ و تخلص عليه كارو و يحويك من الفوق، دكشي ممسلكش، مكيوكلش الخبز، خونا كيصوني كل دقيقة، ركبت فالطوموبيل، لابيز والهضرة بالفرونسي، ضروري باش تبان كلاص، مشينا نتعشاو، بقا كيهضر بزاف، فرعلي كري، معقلت على تا كلمة من دكشي لي كان كيعاود، كنت كناكل، بحال شي حد عاد خرج من الكهف، موراها دخلنا لا بواط، طلب جوج بيرات، كتلو لا بلاتي، أنا بغيت غي كوكا،شاف فيا شوفة ناقصة، صحابلو كنمتل عليه، باغا نتجوج زعما
أنا ما كرهتش فحقيقة، ولكن ميمكنش، حيت كنكره الرجال، كيجيوني كاملين بحال با، الواليد مقود، كنت ديما كندعي فيه قبل مننعس، كندعي يموت، ميرجعش من الخدمة، حيت كيكرفص الواليدة بزاف ولد القحبة، صغري كامل وانا كندعي، فاش كندعي كنبكي، كتولي واحد الدوارة كبييرة فالمخدة، كنحط راسي عليها، مع الوقت لقيت السما كاع ممساليالي، مكتشوفش جيهتي، بديت كنفكر نسالي معاه أنا نيت، ولكن منقدرش، كنخاف، سالات السهرة، مشينا للدار عندو، شويرف شوية، ولكن كنت كنقنع راسي أنه مستيلي، دوك الشراف الي كيجيهم الشيب زوين، ولكن دياب كيكونو، دارو كبيرة، لاباس عليه ولد لحرام، بيوت كبار، أكبر من دوك الديور الي كنت كنشوف فالافلام، وفراش مقود، كلشي جلد وكوير وريدويات صداع، أول مرة كنشوف هوم سينيما، هو لول يمكن الي دخلها للمغرب، تلاجة الي كتحل من جوج جيهات، تلفت فدكشي أنا
فين ما درت كتبالي سواتش ولا سنسلة ديال الدهب، بديت كنفكر نهزلو شي وحدة نديرها فالصاك، خفت عاوتاني، عاد فهمت لاش القحاب مكيكولوش سميتهم الحقيقية، تا أنا غنبدا نسمي راسي، ميمي ولا فاتي، الي كان، مهم منبقاش نزكل بحال هاد الفرص، دخل هو بيت النعاس، سهيت أنا فدكشي حتى بقا كيعيطلي، كتلو لا غا خليني هنا كنتفرج، كالي اتفرجي مع الخمسة د الصباح، مالكي زملتي، أول مرة كيخسر معايا شي حد الهضرة، أنا متقفة، أنا طالبة، أنا كنقرا الفلسفة، وايلي ميمكنش، مال هاد لقلاوي داخ، بقيت ساكتة و جامدة فبلاصتي، كالي اجي غي حكيلي شعري، مشيت بالشوية، تخشيت حداه، كلعبلو فشعرو و يدي كاملة كترعد، وهو كيتكسل، وكيقيسنس فبزازلي، قلبي كيضرب بزاف، كنت ديما كنكول أن أول واحد غننعس معاه غنكون كنبغيه بصح...مكتابش
لا يوجد تعليقات
أضف تعليق