مغاديش نديها معايا أصلا مغاديش نتعطل غادي نوصل نعيط على ختنى
بغات تشوفني مرحبا مبغاتش غادي نرجع صافي سارة معندها علاش تعرف , لمهم بنادم كلا جمعنا داكشي يحيى مشى لدارو دخلت لدار خليتهم تيجمعو فدار وطلعت لبيتي نعست لغد ليه جمعنا داكشي رجعناه لماليه راجعين لدار أنا ويحيى قاليا لقيت لبنت لي تدير داكشي لي دوينا فيه لبارح قلت ليه من نيتك ؟قالي ولله حتى فكرة زوينة عندك وغادي تعرف شنو تحت دماغو قلت ليه وخا شكون هاد لبنت وهو يعيطليها مشينا لدربهم تنتسناو وهيا تخرج تنشوف فيه من نيتك لبنت صغيرة تنسولها شحال عندك من عام قالتلي 17 خويا ولاو تيكبرو بزربا تنشوف فيه من نيتك باغي تصيفط مي للحبس قاليا تراه شيطانة هادي أنا لي عارفها ولله حتى تديك للواد وترجعك عطشان قلت ليه وخا أولد ناس تنشوف فيها لمهم بنت ناس ختي خطبها واحد لبرهوش معرفتش شنو تحت راسو محملتوش وبغيتك تعرفي لينا ولا على لأقل شي وضعية ماشي حتال لهيه صورة وحدا غادي نوريه لخوادرية باش دير عقلها قالت ليا واه صافي مرحبا عندو فيسبوك ؟ جبد ليها يحيى لمعلومات عندو نمرة خونا و كونطات كاملين سيد غير ضايع فهاد لبلاد بلاصتو فل FBI عطيتها نمرتي و 200 درهم نزلات مشيت أنا و يحيى لدار باركين جات سارة حتى هيا بركات حدانا تحاماو عليا تيقولولي باش نرجع نبدا لعلاج ولا ندير لعملية قلت ليهم غير تهناو ديجا فدماغي غنبقى حتى نشوف ولدي عاد غادي نمشي وخا تلاقا سما مع لأرض مغاديش نديرها دبا لمهم دوزنا داك نهار غير صداع ودير لعملية لا دير لعلاج لا دبا لا غدا ضروني فراسي ... لغد ليه هزيت ديك طونوبيل وشاد طريق لديك لمدينة لمزيكا و لقص فطريق تنتفكر أول مرة فاش كنت غادي فلكار وفراس مالي 3000 درهم ومضاية دنيا تتقلب بزربا وصلت تنسول على ديك لبلاصة لي نعتلي وسط واحد لفيلات وأنا نصوني على ديك نمرة مجاوباتنيش تنسول فبنادم دار فلانة نعتوها ليا مشيت ليها نزلت غادي للباب معارفش شنو نقول تندق وهيا تحل لباب واحد سيدة قالت ليا سلام وعليكم سلام ولدي كين شي ما نقضيو قلت ليها تنسول على فلانة ؟ قالتلي أه أنا ماماها هيا خدامة دبا قلت ليها أنا جاي من ... وبغيت نشوفها معرفة قديمة قالتلي دخل تسناها شويا تدخل لدار هادشي لي درت دخلنا لدار باركين بزوج جابتلي قهوة تتسول فيا منين تتعرفها خويا متنعرفش نكدب قلت ليها شنو كين من لول فاش كنت مع بنتها وقالتلي نجي نعاونها كلشي كلشي بقات تتقوليا سمح لينا وكدا صافي شويا دخل باها وبقينا تنعاودو ليه حتى هو شي ساعة عاد تتدق ختنى فلباب حلو ليها جات تتشوف فيه شكون هدا قلت ليها محمد بقات تتشوف قلت ليها محمد عشير يحيى ... وجها تبدل بركات حدايا تتشوف فيها فين كنتي سمعنا بلي خرجتي من داركم شنو وقعليك تنشوف فيها مفيا لي يعاود تاني قلت ليها بلي دبا مزوج ومراتي قريبة تولد و ... قالتلي كل واحد تياخد على قد نيتو حتى أنا كنت تنسول عليك سمحلي على كلشي ولله معرفتش شنو كان تيقوليا راسي فديك لوقت ... لمهم بقيت عندهم شويا حتى طاح ضلام معياو معايا بقا ليلا عندنا قلت ليهم لا أصلا غير واحد ساعة ونص ونوصل لدار خرجت شاد طريق دماغي رتاح أصاحبي غادي راجع فليل طريق خاوية طالق لمزيكا وتنغني تتعيطلي لاورا مزال مبدلتش ليها سميتها فتيليفوني جاوبتها ألو أنا كانت عندي شي خدمة وجاي راجع واحد شويا نوصل قالت ليا مشيتي عند ديك سيدة ياك مديتينيش معاك ومسولتينيش قلت ليها بنت ناس واش خاصني نبقى نسولك قبل ما نخرج صافي أنا راجع وصلت لدار تاني مرة غادي نتناقشو بزوج هكدا لواليدة تتبرد هيا و لخوادرية قالت ليا من نهار جينا لهنا تبدلتي و... قلت ليها راه ممشيتش ننعس معاها غير دوينا عادي ورجعت تتقولي إوا مني مشيتي غير تدوي معاها علاش مديتينيش بقينا شي ساعة وحنا داوين وليت غير تنبرد هاد زبلا حاملا غنوليو فشي طاب وشي ما طاب بردنا لقدية جابولي عشايا تعشيت وطلعنا للبيت تيباليا مبقى عندي ميدار فهاد لبلاد من غير ختي و لواليدة هوما لي شاديني يمكن نخلي هادشي ونطلع ندير لعملية ونرجع ولكن إلا مرجعتش داك ولد ناس غادي يدير لي بغى فختي تندوي مع يحيى قلت ليه بلي يمكن نرجع منين جيت ندير لعملية قدما زربنا فيها حسن قاليا كون هاني من ناحية لواليدة ديالك وختك راهم فعينيا , قلتها ل لاورا بنت ناس وجدي وراقيك و.. غادين نرجعو هاد سيمانة ندير لعملية فرحات بارك شاد تيليفون تنةصي ف يحيى حتى تيوصلوني شي أديوهات من نمرة معمري شفتها دخلت لأديو لول عادي طلقتو هادي غير ديك لبنت قالت ليا فين سفا لمهم راه دويت مع داك لولد فلايسبوك وتلاقينا قبيلا ودبا دوينا فواتساب قلت ليه بلي سمعت بلي خاطب اطط نوريك شنو قاليا تنزل لدوك لأديوهات خونا داكشي لي فهمتو من هضرتو بلي باغي لخوادرية غير حيت عارف لواليد مخلي ليها شي رزيق وتتبقى تعطيه فلوس قلت ليدك لبنت ديري معاه غدا وقولي ليا لبلاصة قالتلي وخا ولكن بلاما تشريلي صداع معاه يولي دايرلي شي حاجة نتا مكتعرفنيش قلت ليها وخا غدا قولي ليا لبلاصة قالتلي وخا غدا نعيط ليك .فديك ساعة مشيت لبيت مريم تندق نااعسا بقيت تندق وهيا تفيق لواليدة جات حتى هيا شنو واقع مريم حلاتلي لباب قلت ليها باغي ندوي معاك دخلت للبيت وسديت لباب تنشوف فيها أري ليزيات عطاتهم ليا درتهم وعطيتها تسمع بقات غير كتدور فعينيها قالت ليا كان عندك لحق من لول سمحلي تتقوليا وتتبكي قلت ليها واش أنا غنكدب عليك أبنت ناس شنو عندي من رباح من لول قلت ليك ديري عقلك لمهم دبا مديريش فبالك غدا غنمشي نتفاهم معاه ونتي بلاما نوصيك نلقاك تتدوي معاه من بعد غادي نتفاهم معاك أه وفاش منكونش وقعاتليك شي حاجة ولا دوا معاك قوليها ليحيى حيت غنمشي ندير عملية ويمكن نتعطل وهيا تعنقني قلت ليها نعسي نعسي دبا غنبقى غير عايش ليكم أنا قلت لواليدة تنعس صافي سالينا من دوك ناس رجعنا أنا وسارة لبيت قالت ليا بلي غتدوي مع طبيب يوجد غدير للعملية قلت ليها وخا بقينا داوين شويا نعسنا لغد ليه فايق بكري فطرنا مشينا تنقادو فشي وريقات باش غنرجعو و دينا طونوبيل لماليها عيطت ليحيى رجعنا لدار وهيا تصوني ليا ديك لينت نعتاتلي واحد لقهوة مشيتلو أنا ويحيى درنا براسنا باغين غير نتقهواو وقفنا عليه مضربناه ما والو قلت ليه نشوفك مع ختي ولا قريب منها مكينش لي غادي يوقف بيناتنا ولله حتى ندخل على ولدي للحبس نتا مزال معارفنيش شنو نقدر ندير على ود عائلتي خونا ولا غير تيبرد قاليا صافي أخويا خليناه واجعين لدار تنوصي فيحيى على لخوادرية و لواليدة وخا معاطيانيش خاطري نمشي ونخليهم معرفتش علاش... راجعين لدار انا ويحيى تنوصي فيه على لخوادرية و لواليدة خاصني نمشي وخا معاطيانيش خاطري نمشي ونخليهم معرفتش علاش لمهم وصلني لدار باغي ننزل قاليا تسناني نزلنا وهو يعنقي قاليا سمح ليا على أي حاجة درتها ليك أخويا قلتلو هاد لهضرة تاني قالي خويا وخا نبقى نقولها حتى نموت نحمد لله ملي عطاني فرصة نطلب منك سماح ونشوفك مكينش فحالك ولله تسمح للي ضيعليك 3 سنين من حياتك وبعدك على والديك قلت ليه يحيى نسامحك هيا إلا درتي ختي و لواليدة فحال عائلتك خويا أنا راه ممسوقش ليهم قاليا كون هاني نتا غترجع أنا حاس بهادشي خليتو ودخلت لدار لقيت سارة تتجمع حوايجنا قالتلي غدا فليل غنمشيو لواليدة تتبكي ولدي يلاه جيتي تنعنق فيها وتنبوسلها يديها ميمتي خاصني نمشي ندير لعملية ونرجع متنساينيش بدعاء و إلا وقعاتلي شي حاجة غادي نوصيها باش تربي ولدنا هنا متنساينيش بدعاء وهيا تحط يدها على حنكي مسحاتلي دمعة محسيتش بيها أنا قالتلي غادي تربي ولدك وغادي تحضر لجنازتي متخافش بقينا داوين مشيت لعند لخوادرية تندق فلبيت حلاتي لباب دخلت بارك تنشوف فيها بنت ناس سدينا لموضوع ديال داك لولد ياك غادي نوصي بنادم يشوفوك معاه غادي يعيطولي ولله حتى نرجع لتقاشر مك نعطيك شي صلخة مضايراش وهيا تعنقني قالت ليا متخافش غير متعطلش علينا معندناش من غيرك قلت ليها غادي نرجع إن شاء الله و إلا مقدرتش نرجع غادي تجي سارة ولد خوك غتولي عمة بغيتط تهلاي فيه قالتلي غادي تجي إن شاء الله خليتها وخرجت لعند سارة تتجمع فحوايجنا قلت ليها نفس لهضرة إلا مرجعناش بزوج ترجع بوحدها بغيت ولدي يكبر مع لواليدة بقيت معاها حتى حلفاتلي لبست صندالة ديال صبع فرجلي وشورط وغادي لبحر أنا وهيا على رجلينا أصلا قريب كرشها كبرات وصلنا باركين فواحد لقهوة لواحد هو لي يتعنب على حلالو قبل ما يموت دوزنا أخر نهار طوب دبصح رجعنا لدار دوشنا لوقت لي باقي لينا تيطير غادي نبعد على عائلتي تاني قلتها ليحيى جاب مراتو وجاو يتعشاو عندنا باركين خالقين سعادة غير بلقهوة و لحلوة حطو لعشا بارك تنتفلسف عليهم فداكشي ديال لكوزينة حتى تيرجعلي حريق راس تاني مدويتش بزربا طلعت لبيت تنقلب فدوايا لقيت حبة لي باقيا شربتها بقيت بارك حتى عطى مفعولو عاد نزلت لواليد لله يسمحلي منو كان صابر على هادشي كامل ومحسسنا بوالو حتى دا مول لأمانة أمانتو داك شهر لي غبرو من لواليدة يحسابلي هو ماشي تيسركل وهو ماشي يتعالج داك سيد مكينش فحالو مشى يحيى ومراتو بقيت تنوصي فلواليدة على مريم ولعكس لغد ليه فقنا بكري مشيت لقبر لواليد بقيت تندوي معاه نقدر نلحق عليه قريب غير هو كان راجل مزيان وكلشي تيشهد ليه بيها و أنا كاري بيت انا و أبو لهب فجهنم بلاصتنا فوق شواية , غير لله يستر خايف من شي حوايج درتهم فحياتي رجعنا لدار لقيت يحيى قدام لباب دخل معانا لدار جاو خواتاتي حتى هوما جايبين لمسمن أخويا أخر حاجة ناكلها فهاد لبلاد لمهم كلينا ضحكنا وفاش بغيت نخرج بداو تيبكيو كاملين من طرف لطرف خواتاتي و لواليدة حتى من لاورا/سارة عاداوها ولات تتبكي بحالهم سيدة أنوثتها ضاعت فهاد تسافيرة😂 لعيب ماشي فلبنات لعيب فلجو ديال لمغرب فيه شي سحور ده إحنا معمولنا عمل يا جماعة لي جابها من شي قنة يخليها تما وياك وتجيبها لهنا .
ضروني فخاطري ب بكاهم غادين ومحاملش نمشي إلا وقعاتلي شي حاجة منعرف شنو غادي يديرو سفة و لمرقة ولا كسكسو , وصلنا يحيى للمطار دخلنا تيعنق فيا مرضني بديك سمحلي عقدني فحياتي ديال بصح مشى بقيت أنا و سارة تما باركين مقابلين ديك لكرش عندها شاك فيها توام ولا شي ولد عملاق من داك نوع لي تيلبس 44 فرجلو تيعيطو على رحلة ديالنا مسخيتش أساط طلعنا فديك طيارة غادين أنا وهيا تتقوليا هانتا غتدير ترويض هنا و لعملية هنا طبيب فلاني مشهور مضمونة تنشوف فيها تتضحكي عليا واش هو غادي يحيد ليا طرف مني تينيسة من راسي ونتي تتقولي ليا غتبقى بيخير يمكن كلشي يتبدل بعد لعلملية نقدر نولي حمق ولا ننسى كلشي شداتلي فيدي قالتلي غير نسى كلشي وبقى غير حي وااع فرحاتني قلت ليها لهاد درجة تتبغي هاد لعبد لله لي قدامك قالت ليا نسى كلشي باش نعاود نربيك على يديا😂😈 ههههه إن كيدهن لعضيم بقينا خالقينها داها نعاس بقيت غير تنشوف فيها حتى وصلنا لقينا خالتها تتسنانا نسينا مجبنالهم والو شوهة دبصح لمهم ديك ليلا غير نعاس عينا أخويا لغد ليه مشينا لعند طبيب قاليا بلي خاص ندير شي فحوصات وشي ترويض حيت عملية صعيبة وطبيب لي غادي يديرها فأمريكا يلاه غادي يجي قلت ليه وخا خرجنا من عندو مشينا لمطعم متتبانش ليا هناء تنسول داك تونسي قاليا راه مجاتش سيمانة هادي تنسول بنادم بصح سيمانة باش مجاتش مشيت انا و سارة لدار فين تتسكن ملقيناهاش و جيران تيقولو حتى هوما بلي سيمانة مجاتش تخلعت ديال بصح تنعيط على باها لا تكون رجعات قاليا لا ومدواتش معانا شي سيمانة وايلي فين مشات هاد بنت ناس حتى فلوسها مزال فدار تكون زعما تزوجات داك نهار تنسولو وتنقلبو ملقينا والو نهار تاني علمنا لبوليس عطيناهم صورتها منقدرش ندخل للعملية وانا معارفش هيا فين باها موصيني عليها تنقلبو ليل ونهار ولبوليس وباها تشوش تيعيطلي 11020033 مرة فنهار دازو 3 يام عاد تيعيط لينا بوليسي قالينا يمكن لقيناها مشينا لعندو أنا و سارة قالينا بلي شي وحدة فلمشرحة تتشبه للي فصورة قلت ليه لا ميمكنش تكون هيا هاد لبنت مكينش لي يأديها قاليا يلاه تشوفو واش هيا مشينا لاورا مقدراتش تدخل واحد ريحة خيبة وهيا حاملا دخلت أنا تلاقينا بطبيب دانا لواحد تلاجة ديال لموتى وهو يحل واحد لباب جبدها مع تيحيد داك ليزار تتباليا هيا معرفتش شنو نقول رجليا فشلو مضروبة فعنقها ولا قول مدبوحة من عنها تيقوليا لبوليسي وقف شد فراسك سدو داك لباب قلت ليه هيا شكون دار ليها هكدا ؟؟ قاليا معرفناش لقيناها فواحد زنقة لا وراق لا والو دبا عرفناها بلفضل ديالكم واش عندها عائلة يديوها تنتفكر باها شاد من راسي قاليا تقدر تمشي حتال من بعد ودوز لعندنا خرجت لاورا تتسول فيا واش هيا واش هيا مقدرتش ندوي شنو غادي نقول لباها شكون دار ليها هكدا وعلاش شكلها قبيلا معمرو يتنسالي بنادم لي تيعرفي تيموت وليت فحال Death Note يتبع ....
لا يوجد تعليقات
أضف تعليق