الحلقة الخامسة. المرفحين كيولدو مرفحين والحازقين كيولدو الحازقين تاهوما كيعاودو يولدو محزقين اكثر منهم= يمنع على اقل من 18 سنة
عاوتاني بقاتلي ساعة ونخرج، راس كيكولي خرجي، وراس كيكولي بلاش، ولكن القضية عندي مزيرة، معندي تا ريال، عندي غي الصولد فالتيليفون، شي ميتين درهم د الصولد، كون غي كانت كتصرف دراهم نشريها غا خبز وبيض بعدا، معليناش، لبست عاوتاني على سعدي ووعدي، كحلت عيني تكحيلة دايزها الكلام، باش يالاه نغطي الصفورية، وجهي شاحب، صفر، مريض، درت الفاراجو مزيان، وعكر ربعة وعشرين ساعة، هو الي كنكساب، مكنحملش نشري الماكياج، كيجيني غالي عليا، عندي واحد لعكر كنخورو بصبعي لا بغيت نعكر، وقلم كحل فيه شي تلاتة سنتيم، عييت مننجر فيه، واخا فدوى مسكينة كتكولي فاش تكوني خارجة دوزي نكاد ليك كمارتك، هي مقومة مزيان دكشي، باش كنكوليكم ماشي ساهل التقحبين، تاهو خصو قوامو
خرجت، كتبالي واحد الطوموبيل كحلة كلاص، معرفتش شمن ماركة، مهم طويلة وزوينة، وداك وجه الكلب خارج منها، شفتو وانا نتعقد، ربي كيعطي الفول غا الي معندو ضراس، كيعطي الحديد والفلوس غا لوجوه الحبس، فاش شفتو ندمت كاع لاش ماكيت وتسلفت شنو نلبس، هدا خصني نخرج عندو بجلابة وبزاف عليه، شافني هو يقيم، داخ، وانا فراسي كنكول الله ينعل بو الوقت الي خلاتني نركب مع واحد بحالك، كرهت راسي، وكرهت الفقر، وكرهت لاش تزاديت فهاد البلاد ديال النم، لابس قميجة بيضة، كلاص زعما، عنقها موسخ، مدودة، معمرو بدل عليه واقيلة، مع طلعت صونات مراتو، وافينك؟
شاف فيا وغمزني، متهضريش زعما، أنا معندي منكول اصلا، غا مكمداها فعظامي وساكتة و كندعي الله يدوز هاد الليلة على خير، كيشدلي فيدي مرة مرة، كتجيني التبويعة، كندير راسي كنتمنظر من الشرجم، واخا انا هي المنظر المقود د بصح، واحد وعشرين عام خارجة مع واحد عندو شي ستين عام، وخص ديرلو الخاطر، وانا شكون يديرلي الخاطر؟ باش عجبني هاد سعيد، عروبي ديال بصح، من دكشي الي كنبغي، مكاين لا فرونسي لا ستة حمص، نيشان مشينا ناكلو الشوا، هو عندو تجربة مع الطالبات، مدوز منهم بزاف على حساب ماعاود، عاودلي كاع انه ضبر على شحال من وحدة فخدامي زوينين، كيطمعني زعما، ولكن معامن، انا مكنشوفش بعيد، كنشوف غي ديك السيمانة ولا خمسطاشريوم كاع، ونقلب، حيت منقدش نطول فاللعبة، دكشي كبر مني، وتا لقيت راسي فيه بلا خاطري، معندي لا يد لا رجل فيه
تحكم عليا نتولد فدار مقودة عليها، بلا الفقر كاع، حيت الفقر ماشي عيب، ولكن فاش كيتجمع الفقر مع المشاكل و فريع الكر صعيب تستحمل، قرايتي هي الامل الوحيد، حيت عارفة راسي مغنكملش فهدشي، ماشي ديالي، مكرهتش فحقيقة، ولكن صعيب بجهد، كنت كنعتبر انني فخدمة مؤقتة، بحالا شادا السربيس فشي موقف، حنا كنتعشاو وهو كيعاود، شكون عقل علاش، مهم بقيت شادة غا شي تويشيات، كنكون مغيبة فديك اللحظات، كيعاود انه واحد بنادم الي كون راسو من والو، وبدا من الصفر، وديك الهضرة ديال جدريال، كدخل من ودن وتخرج من لخرا، تا أنا مكرهتش نكون راسي من الصفر، ونبدا من اللول، ونعطي لراسي دور البطولة ففيلم مختاريتوش، بالحق والله وماكنتي لالا ومالي لا قرقبتيها معاهم، دكشي هاكاك داير، المرفحين كيولدو مرفحين، والحازقين كيولدو الحازقين، تاهوما كيعاودو يولدو محزقين اكثر منهم، فاش سالينا لعشا تقضالي عشا اخر، لابتسام وهجر، سبب اللقاء، وداز على مول الديسير، شرا بزاف ديال الديسير، وصلني منين ما هزني، قبل مننزل مدلي كمشة ديال الفلوس فيدي
،كتلو لا والله ما نشدهوم، هو كيحلف وانا كنكول ياربي ميردهومش لجيبو، فاش نزلت العساسة د الباب ضحكو معايا،ضحكو عليا زعما، شي كاميلة هادي يا العفريتة، سعدات الي عندو الحديد، عطيتهم بنانة بنانة، بلا منهضر، وصلت لبيتي و بقيت كنصوني ونقطع على الدريات كاملين، حتى الخوانجيات، كلشي جا يتعشى، ويسمع القصة، انا ما فيا منعاود شي خرية، خليتهم كياكلو فرحانين، شعلت عليهم كارو وبقيت حاضية دخانو فين غادي...
لا يوجد تعليقات
أضف تعليق