قصة مسعودة الحلقة 6

الحلقة 6. كنت كنحلم نتلاقا شي شارف يديرني بحال بنتو، مكنتش عارفة را كاينة البيدوفييا: بغيت بنتي تعرف أن الدنيا عامرة قوادة: يمنع على اقل من 18 سنة

 

باش نكتب شي حلقة، نهار كامل وانا هازة ليها الهم، فالخدمة، فالكوزينة، فاش كلعب مع ولادي، فاش كنهضر مع راجلي، ديما بالي مشغول، كنصبح مسخسخة بحالا كنت كناكل لعصا، فكرت ناخد كونجي تا نسالي كاع دكشي الي بغيت نكول، ولكن ميمكنش، شنو أنكولهم، كنسرق سويعة فالنهار نشعل البيسي، الصفحة البيضة كتبقا فيا فاش كنوسخها بقصتي 

 

مكرهتش كون كتبت شي حاجة كتفرح، بالحق الغالب الله، هدشي واخا دازت عليه سنين جرحو باقي خضر، عمري نساه، وقت ما شفت بنتي مفركسة ومكوكسة وخارجة تقرا كنتخلع، مبغيتهاش نعيش تا شوية من دكشي الي عشت، تقدر تكون كتقرا مسعودة دابا ومعارفاش ان هاد مسعودة را هي ديك المراة الي فالكوزينة كتصايب لعشا ولا كتعاون ولدها فالتمارين، بغيتها تعرف أن الدنيا عامرة قوادة، أن ديك الهضرة ديال الدنيا مزال فيها الخير غا كدوب، مكاينش الخير، مكاينش الي يعطيك ألفرنك في سبيل الله 

 

فدوك اليامات فاش كنت باقا دمدومة كنكول شي نهار أنطيح على شي شارف ويديرني بحال بنتو، مكنتش عارفة را كاينة البيدوفيليا، ولا كنحلم ديما اندوز حدا شي بركاسة و غتبالي شي ميكة كحلة، نحلها ولقاها عامرة فلوس، تقدر تلقاها بصح، بالحق عامرة خرا. 

 

خليناها فشعلت كارو وبقيت حاضية دخانو فين غادي...حسبت ديك الكمشة د الفلوس الي عطاني لقيت الف درهم، مزيانة، اول مرة كنشد هاد الفلوس كلهم، حيت من نحسي تا المنحة ما عنديش، درتهم فالمخدة الي كنعس عليها، كابتة شفرة عدنا، بنادم لا لقا منين يدوزليك تا عينيك يخونهومليك، خاصيني شي كتوبة، خاصني ما لبس، خصني صباط، خصني كبوط، خصني مناكل،خصني بزاف، بالحق انسبق الكتوبا، صباطي نطرفو عند الخراز ونقضي بيه تا لازادني داك القواد شي حاجة، مزال كنفكر فهدشي هو كيصوني تاني، يخ، بغا نخرج نتعشى معاه، كتلو والله ما قادة، توحشتيني؟ 

 

واخا جي عندي حدا الباب د الحي وجيب معاك العشا، ومالو بغا يشوفني فابور؟ كندير هاكا وعارفة راسي راني كنقود السوايع معاه، ويقدر يقلب عليا بالزربة و أنا الخاسرة، البنات عطا الله، أنا الي محتاجاه ماشي هو، خصني نرطب معاه شوية، عل الاقل هو مزال مكاليش الدار و لا الزمر، جبدت شعري مزيان و قاديت حالتي، غي عشرة بحالي يخرجو على الكوافورات، علماتني الوقت ندير كلشي لراسي، ننتف حجباني و نصبغ ضفاري، نلصق الشفار و نخبي كاع الديفويات، واخا هدشي كلو مسرحية، نلعبو تال اخر مشهد، معرفت باش غادي طلع الكتابة ولكن عندي امل واخا هكاك، ولا قلبي قاصح، اقصح من حجرة د الصم، تا المنظر د السعاية فالزنقة ما بقا كيحرك فيا والو، دارنا ما هضرت معاهم اكتر من شهراين، ولا هوما سولو، انا خارجة كيوقفني عبد الرزاق، بغا يهضر معايا، مبغيتش نشوف فيه، مبغيتش عيني يفضحوني، وهضرتو مرضاتني كل مرة، باغي علاقة ملتزمة، باغي نقيلو نخيطو فلافاك بالجوع، باغي نسمعوا فيروز والشيخ امام، باغي نوقفو فالحلقيات نرفعو الشعارات الرنانة ونهزو شارة النصر 

 

عييت ما نشرحليه، عييت ما نصبر ليه، فلخر جبدت واحد الوجه ما عمرو شافو، وما عمر ينسا ديك الهضرة، حيت تا انا عمري نسيتها ولا غا نساها، عبد الرزاق خويا، منصلاحليكش، بعد مني ها العار، خليني نضبر على كري، داك ماركس و لينين حق ربي ما كيخلصو تا الطوبيس د لافاك، مغنبقاش نهز شارة النصر وانا الصبع طالع معايا تال الجدر، الطبيعة دارت معايا مزيان، خلقاتني بنت زوينة، كون كنتي تا انت بنت كون خرجتي تقحب باش تعيش،باغي تلتزم التزم مع كتوباتك وخليني نشوف طريقي، أنا الي ختاريت، ربحت ولا خسرت أنا بوحدي كنتحمل النتيجة، بقا كيشوف فيا، تصدم، هاد مسعودة عمرو شافها، ماشي هادي الي عرف العام اللولـ هاديك كانت بريئة، كانت نية، كانت كتحلم معايا و كيحمارو حنيكاتها لا شديتها فيديها، معمري بستها، تحركت خليتو واقف، حاضي داك القصر الي بنينا كيريب، تبعني تال الباب، تا شافني ركبت فالطوموبيل، بقا تابعني، بالحق الحديد مزيان، سبقو و خلالو غا الغبرة، ديك اللحظة بغيت نعنقو ونبكي، ونطلب السماحة، الافلام د المكسيك عاوتاني، تفو، بست داك القواد ورسمت واحد الضحكة صفرة، سولني فين بغيتي تمشي، مفكرتش، جاوبتو بالزربة، اقرب حفرة، بغيت نشطح، بغيت ننسى، بغيت نخرج، محسيتش تا هبطولي الدموع، سخونين طايبين، مسحتهوم بكلينيكس دغيا باش ميضيعش الماكياج ويضيع كلشي