الحلقة 7. كانت ديما كتكولي نتي يا مسعودة غا تخرجي شي حاجة، اتولي شي حاجة كبيرة،شي موظفة د المخزن، تقولبات مسكينة، ما خرجت والو
شطحت، عرقت، ولكن ما بردتش، فيا شي عافية شاعلة لداخل فصدري، كتكوي، تخلطت وسط الناس و الزحام باش ننساني، مقديتش، وتا دوك المناظر الي فالحفاري بوحدهوم، وعيني كتمشي غا ليهم، مكنشوفش الي خارج ينشط و يقصر مع صحابو ولا مع مراتو، الي جاي غي يفوج كنشوف غي دوك البنات الكتار الي واخا يضحكو تا يشبعو و يخبيوا تا يعياو عينيهم فاضحينهم، عينيهم فيهم حزن مقود، فيهم فراغ و ضياع، ديك الساعة كيزيد يطلع لي الدم من راسي، مالي دايرة هاكا، مالي تا فالوقيتة د النشاط كنصيد غي لقطات القوادة، كنشوف غي البؤس
رجعت كلست حدا خونا، كان بدا كيتنغم، أنا مكنشربش، انا فمهمة، ومخصنيش نتبلى، انا غي كثرة الهم كتسكرني و نقد نبدا نلوح حوايجي كاع، وعاد الشراب كيبهدل، كيرد بنادم حنين، كيولي باغي يتسامح مع كلشي، تا الي صرف فيه العيب شي نهار، انا مقتنعة واخا نسكر كاع معمري نسامح ولا نغفر، معمري نسمح للواليد، للمجتمع، لولاد القحاب، للريوس الكبار الي فرقوا كلشي بيناتهم و خلاونا نتفرجو، واخا تقاتل تخدم و ضبر على راسك يالاه غا تكافا مع الوقت، معمرك تهز الراس، كيعطيوك غي باش تبقا حي ماشي باش تعيش
لا بغيتي تعيش خصك تكون منهم، انا عمري نكون منهم، دكشي هاكاك داير، ميمكنش تفهمو، دائرة مسدودة صعيب دخليها، كيتحكم فيها شكون انت وشكون باك، انا الواليد كيبيع الخضرة، و الي صورو فالنهار كيطبو فالليل، و غا على القحاب الشارفات، كيدوز من حدا الدار هاز التقضية، كنفرح، كيصحابلي جايبها لينا، كيديها لمينة، مينة قحبة ديال ألفرنك، تقدر تعطيها غا كارو و تنعس معاها، دازو عليها كاع البراهش د الدرب، كاع الي بغا يتعلم كيمشي عندها، مدرسة مهدومة، قحبة فاشلة، حياتها كاملة هازة رجليها و مدارت تا وزة، باقا عايشة فبراكة، كانت زينة بزاف، كتغني حسن من خربوشة، فاش كطلق داك الحلق عندها كتبورشك، كتزلزل، ولكن خرجات عليها البلية الحشيش و ماحيا و فين مكانت شي مصيبة، الشباب مكيدومش، كانت ديما كتكولي نتي يا مسعودة غا تخرجي شي حاجة، اتولي شي حاجة كبيرة،شي موظفة د المخزن، تقولبات مسكينة، ما خرجت والو، خرجت بحالها، ولكن نهايتي اتكون احسن منها
معليناش، خونا فاش سكر بقا كيلوح يدو، ها الزملة بدات، يدو تقيلة بحال الحجرة، وعرقانة وموسخة، وانا خصني نخليه شادلي فيدي، وخصني نضحك، عاود شي نكتة حامضة، ما سمعتهاش، ولكن بقيت كنضحك، كنغوت بالضحك، كنشد كرشي بالضحك، حيت مكاينش شي نكتة كتخري بالضحك قدي، كنضحك على همي، هو فرح، وبقا كيعاود النكت، وحدة أبسل من التانية، وانا مزال كنضحك حتى سال الكحل على عيني،ساح و تجلخ و كلينيكس ميمكنش يمسحو
كيما ميمكنش نمسح قصتي من بالي، رجعني منين هزني، طالق الغيوان، غبتي مع غروب الشمس...جهدت فيها وبقيت كنسمع، كانت أول مرة كنسمع ديك الاغنية، ولا أول مرة كلماتها كيقصحوني، حسيتهم كيغنيو على مسعودة، كيعرفوها، كيعرفو واقيلا كاع دوك الدريات المقزبات الي خليت كيتمايلو بالشطيح...
وريدات د بلعمان دبلوا و تا هوما كيتسناو الربيع يزهر.
لا يوجد تعليقات
أضف تعليق