على مايبدو لي أن فاتحة لعقتها فكرشها ملي مابقاتش قادا توقف على رجليها …… بقات كاتحبو بحال شي دري صغير كايتعلم إتمشى تا وصلات لعندي أنا تكسلت على ضهر ركبتي مابقيتش قاد نحركها لعقتها فيها ديال بصاح بلانشا باش،ضربني داك ولد القحبة بلانشا كبيرة وصحيحة إمتى قوتها بالحار ديال الضربة زدت وقفت بيها وتبعتو البيت باش مايغتصبش فاتحة ….. حاولات معايا فاتحة نوض نغسل وجهي ما قديتش تجبدات حدايا تا هي خلاونا ولاد القحاب مجبدين بحال ضحايا ديال شي معركة الدار كلها قلبوها …. ناضت فاتحة جابت واحد صطيلة فيها الماء وفوطة كادوز ليا على وجهي كاتوصل ليا لجهة عيني كاتعطيني صداع قلت ليها عيني مشات ياك حيت حاس بلي مقادش مزال نحلها …. فاتحة كاتبرد فيا و كاتهدني لا لا مافيها وااالو عادي عيني تنفخات خارجة فيا بنص مترو ولكن مابغاتش تقولها ليا …… ولكن ماهمتنيش عيني ولا ضهري كثر من رجلي حيت صافي مابقا عندي فين زيد إلى مكانش لي يحركني حاولت نوض واااالو كانرجع لبلاصتي ….. واحد لحضة كانسمعو دقان فالباب …… قلت ليها لايرحم باك ماتحليش مزااااال غايكملونا ولاد القحاب ماتحليش …… قالت ليا لا غانمشي نشوف شكون وندوز زكروم ….. إلى ماعرفتش شكون مغانحلش قالت ليها شكووون …. صوت رقية باين ولكن كيفاش رقية عندها ساروتها وكادق ……. دخلات رقية من وجه فاتحة عرفة بلي واقعة شي حاجة ماشي هي هاديك قالت ليها مالك هداك ماااالو تا هو ….. جات لعندي نيشان موحماد مااااااالك شكون دار فيك هد الحالة ….. موحماد دوي شكون دار فييك هد الحالة ….. بقيت حال عين واحد وشفت فيها قلت ليها علاه أنا عارف كن كنت عارف راه لاباس الله وعلام واش هو جن ولا إنس أااااااااااااح ربي ركبتي ……. فاتحة دوي مالكوم مالك تانتي مشنتفا شكون دار فيكوم هد الحالة …….. طارق ولد الحاجة هجم علينا هو و جوج صحابو دخلو علينا وبالساروت فيديهوم ….. رقية كانت على علم بلي طارق ديما كايقلب فين إدوز لفاتحة وبلي كان واكل عليها جوانط قالت ليها ماتقوليش ليا …… مزال ماكملاتهاش قالت ليها فاتحة لا و لكن موحماد راه لعقها ديال بصاح نتي كاتشوفي غا وجهو راه تضرب تا فركبتو قولي ليا نتي ساروتك فين مشات ….. طاح ليا البزظام جاب الله الفلوس درتهوم فصدري بوحدهوم ……. يعني طارق فين جاب الساروت ديال الدار ……. بزضامي طبعا باينة غايكون طاح ليا غا هنا فالدروج وتصاطح معاه ……. وااااااك واااااك أعباد الله داتي كلها شاعلة فيها العافية وهما مقابلين بيتي كني و فاتحييين عليا تحقيق ….. رقية لاكارط ديالي ماتقوليش ليا درتيها فبزضامك ………. أاااااااه أموحماد كانت فبزضامي ولكن ماتخافش غاترجع …… مشات عاوتاني لاكارط قولي ليا علاش هزيتيها علاش ديتيها …… بغيتك تبقا معايا مزال اليوما خفتك تفيق و تمشي غا كنت عند ولدي ….. بغيتي نبقا معاك ولا نبقى باش تخلا دار بويا ….. مشات رقية لبيتها حلات الماريو ديالها و طلات على حوايجها ودهبها ماداو ليها وااالو ماطرطقوش الماريو حيت طارق ماشي شفار هو وصحابو غا طاحت الساروت فيديه وستغل الفرصة تا أنا وفاتحة مادروش الحساب بلي غايلقاونا مكانوش معولين علينا غا ضربو علينا صدفة حيت قالها لفاتحة ملي غايخرج قاليها مجيتش معول عليك هد المرة ولكن أنا وراك وراك والزمن طويل مهم نتشاوف ساعة خرى و هو يرضخ الباب …….. سولت رقية فاتحة واش داو ليها شي حاجة قالت ليها لا رونو وريبو الكتوبة وخواو بليزتي لقاو غا الحوايج عشرة لاف لي عندي كاين تحت الناموسية ……. ولكن موحماد راه داو ليه داكشي لي عندو ……. قالت ليا رقية شحال داو ليك أ موحماد قلت ليها داو بزضام …… وااايييه البزضام شحال فيه فيه ربعين ألف ريال مابقاتش فيا …… واشنو بقا فيك ؟؟ بقات فيا تصويرت مي غايلوحوها فشي طاروووو د زبل و هي لي عندي تصويرتي مي كانبوسها ملي نفيق و ملي نبغي نعاس كل نهار فأخر المطاف تلاح فالطارو د الزبل ولا تلاح إعفطو عليها الناس برجليهوم فالزنقة ديك التصويرة بوحدها لي عندي ……. ترجل شوية أموحماد مالك باقي صغير مك أنا نمشي نجيبها ليك تال عندك وتشبعها و أرااا ماتصور فيها مزاااال …….. فين غاتجيبها ليا مييي ماتت كن كانت باقا حي كاع مانعيش فهد العداب نخلي الناس معييدين فديورهوم ونجي تخلى دار بويا فأكادير ……. سمحليا أموحماد كانسحاب مك باقا حي ولا ماعرت قلت ليا مييتة مابقيتش عاقلة …… فلوسك ولاكارط ديالك و تصويرة ديال مك غايرجعو ليك كانواعدك …….. نقزات فاتحة وقالت ليا أاااااه بصاح أموحماد والله كلشي ديالك غايرجع ليك دموع نزلين ليه فعينيها ونا عمري نسا خيرك حياتي كاملة و الله أنا سبب فداكشي لي واقع ليك سمحليا …….. قلت ليها فدماغي أودي غا ملي ماتقبوكش هداك هو الربح وراس المال …… قالت ليها فاتحة رقية خاصنا دابا نشوفو شنو غانديرو ليه راه لاعق فرجليه واش غانخليوه هكدا راه مكايقدرش يوقف ….. رقية بقات غا كاتخمم شنو غادير قالت ليها وخا بقاي هنا هانا راجعا مهم باش نكونو مفاهمين نتي من دابا شكون هو موحماد لا فالسبيطار لا عند البوليس لا مولات الدار خوك من مك و جابك من البلاد باش إحطك هنا فأكادير ومكتاب ليه تخلا داربوه عندنا هنا فالدار ونتا أموحماد مامشاتش ليك ربعين ألف ريال مشات ليك ميات ألف ريال وشي صرف …… طلعات رقية جابت مولات الدار دخلاتها البيوت بيت بيت والكوزينة و بداتك كاتبوحط عليها وكاتجدب و كاتغوت واش الحاجة ….. عمرنا عطلنا عليك فلوسك ……. واش عمر شي حد تشكا بينا عندك ….. واش عمرنا أدينا شي حد فالجيران …… ياك أنا لي كانزاوك فالدريات إطلعو يخملو ليك الدار ….. ونطلعو ليك نشير للسطاح و بابنا ديما كان مفتوح ليك ……. شنو درنا لولدك باش إدير فينا هد الحالة هاهي الدرية مسكينة جابها خوها يحطها تديها فقرايتها صدق راجع بوجهو مخمج …… وكانحمدو الله لقاوه بعدا عندها كن كانت بوحدها ولا كنت أنا بوحدي فين غانكونو واصلين راه غاتولي حريرة …….. مولات الدار بقات غا سكتة مكاتقول وااااااالو …… رقية كاتبلبل ونا رجلي كاتقطع فاتحة شادا ركنة كاتبكي …….. شوفي الله إرحم واليديك الحاجة تلاقينا ولاد الناس نتفارقو ولاد الناس نتلاقاو عند المخزن هو لي غايفارينا ……. و دارك غا تعطيينا شهر ديال المهلة نلقاو فين نهزو حوايجنا الله إفارقنا بلا دنوب ولدك إلى مامربيش راه كاين المخزن فالبلاد هاديك هي مهمتو …….أنا سمعت المخزن وجاتني البولة أويلي أعباد الله أش كاتقول هد بنت القحبة أشمن مخزن المخزن أنا لول غايشدني عندو بصيفتي شكون داخل لديك الدار …… ولكن رقية مطورة بنت القحبة عارفة بلي مولات الدار غادير المستحيل باش ماتوصلش القضية المخزن حيت داك الولد بوحدو لي عندها و ماغاتخلاش عليه بأي وجهٍ كان و تماماً داكشي لي وقع …… صافي يابنتي يارقية دويتي قلتي داكشي لي عندك و نا هذاك الولد راه خرجو ليا البنت حسن منو وفضلهوم دابا باش عايشة راكي كاتشوفيه ما باغي يقراا ما باغي يخدم ما باغي يدير تا حاجة ياكل ويشرب وينعس و يكمي و يسكر ويشد راس الدرب ……. و إلى كان نتي هدشي علاش غاتصيفطيه الحبس أنا هدشي راه نهار كانقطع عليه فلوس الحشيش والكارو كانطيح فيها …….. راه الدار ما خلا فيها مزال تاشي،حاجة صالحة كلشي بااااعو ولكن راه الكبدة بنت الحراااااااام أبنتي وهي تبدا تبكي تا هي أنا راه كن كنت عارفاه غايخرج هكدا كن لحتو غا فالطواليط أناااااااااااااا مزاووووووكة فيك أبنتي أرقية ما حاولي تشوفي شي حل أخر من غير المخزن راه كيفما كان الحل راه معمر عليا وراه داكشي لي قلتي فيه صحيح ولكن راه مانقدرش نشوفو بيت ليلة واحدة فالكوميسرية ……. ديري بوجه الملحة والطعام لي مشاركين …… و هد الدرية والدري راه باينين ليا ولاد الناس مغايخسروش ليا ……… و الحاجة والله تا حنا تا كانكبرو بيك وكانحترموك و ديرينك فمتابات منا ماشي كاريا لينا و ربي لي علم بينا وعلى قلوبنا ما بغيناش نوصلو معاك لهدشي …….. واش دابا هد الحالة كايديروها الناس هادي راه كاتسما حگرة ……. قالت ليها ها حنا دابا نيت بغينا نديو السيد لصبيطار تا لاكارط،ديالو ماعندناش داها ولدك و صحابو وحنا بنت الحلال داكشي لي كاين غانقولوه ليك ….. أنا حوايجي راه ما وصلوهومش حيت سادا الماريو ولكن الدري راه داو ليه بزضامو فيه لاكارط،و ميات ألف ريال ……. شوفي شنو غاديري معاه وحنا دابا خاصنا غانشوفو رجليه مالها حيت ضربوه فيها ببلانشا …… ماتخمميش أبنتي أرقية لداكشي بزضامو غايرجع ليه الفلوس مانضربوش ليهم مزال الحساب مشاو غايكونو شربهوم داك القاطع لي كاينزلو مع مصارنهوم و حنا داكشي كل الحاجة ما عرفينوش المخزن راه غايرجع لينا حقنا …… صافي أبنتي بزضامو غايرجع ليه و فلوس ضربيهوم على حسابي حاجة واحدة فاش قودتها رقية وهي لي غاتفرشنا الفرشة ديال بصاح وهي لاكارط ديالي كانت فبزضامها وبزضامها لقاه طارق فالدروج ونا بزضامي فيه غالفلوس و تصويرة مي طارق غايرجع البزاضم لمو بجوج ولكن غا ينبه مو وغايقوليها بلي البزضام ديال رقية لقا فيه لاكارط،ديالي و ساروت ضار وبزضامي أنا لقا فيه تصويرت مي وربعين ألف ريال الفلوس مغاتييقوش ولكن لاكارط غاتييقو أش كادير لاكارط ديالي فبزضام رقية ؟؟ مدام أنا خو فاتحة الحاجة قالت الفاتحة سيري يا بنتي لبسي جلابيتك ونزلي للشاريع جيبي الطاكسي نديو خوك للصبيطار هانا غا نطلع نلبس جلابيتي وننزل …… نزلوه قدام باب العمارة ……… فعلا مشات الحاجة لبسات جلابيتها ونزلات عاونوني هي ورقية تا وقفت وعمت عليهوم بجوج تانزلنا لتحت ……. وصلت حدا الباب وطاحت ليا واحد الحاجة فبالي قلت شوف أموحماد كنتي كاتدخل فهد الباب و نتا كاتقطع النفس و كاتسكل باش ماتسمعكش و ماتشوفكش هد السيدة وها نتا دابا خارج منو ونتا معنكها بفضل القحاب تقدر تدخل للدار من باب الواسع و ملي غاتخرج تخرج من الشرجم ولا تنقز السطوحا ولا تكون تاني العكس تدخل من الشارجام ولا السطاح وتخرج من الباب الواسع نتا وزهرك …………..
يتباااااااااع
لا يوجد تعليقات
أضف تعليق